Accessibility links

җомга, 9 декабрь 2016, Казан вакыты 05:12

Bush häm Blair İstanbuldağı şartlawlarnıñ terrorğa qarşı köräştä çigenügä kitermäyäçägen belderä


İstanbuldağı şartlawlar Amerika Quşma Ştatları prezidentı George Bushnıñ Britaniä säfärenä dä üzençä tä''sir yasadı, xörmätle tıñlawçılar. Atnakiç ul premyer-ministr Tony Blair belän räsmi söyläşülär ütkärde häm anda da iğtibar üzägendä Ğiraqtağı wäzğiat häm terrorğa qarşı köräş mäs''äläse tordı.

İstanbuldağı şartlawlarnıñ britan konsullığı häm britan bankı bülekçäse yanında buluwın qayber küzätüçelär prezident Bushnıñ London säfärenä turı kiterelep yasalğan maxsus höcüm dip bäyäli. Mäğlüm ki, London Waşingtonnıñ xalıqara terrorğa iğlan itkän köräşendä iñ yaqın berektäşe bulıp tora, britan xökümäte amerikannar belän bergä Ğiraq mäs''äläsendä dä tığız xezmättäşlek itä. Bushnıñ Tony Blair belän söyläşülärendä şuşı ike mäs''älä bolay da iğtibar üzägendä toraçaq dip kötelgän ide, İstanbuldağı terror monıñ aktuallegen tağın da arttırdı ğına. Amerikan prezidentı säfären yaqtırtqan mäğlümat çaraları atnakiçne, Bushqa qarşı çığuçı törle törkemnärneñ Londonda kiñküläm uram cıyınnarı oyıştıru köne bularaq kötkän ide. Britan başqalası buylap Ğiraq suğışın xökem itep 100 meñläp keşe ütär dip farazlandı. Anda qatnaşuçılar xätta amerikan prezidentınıñ säfär programmasın bozarğa da cıyınğan ide. Läkin irtän İstanbulda britan mänfäğätlärenä yasalğan höcümnär Londonda planlaştırılğan uram cıyınnarın niçekter artqa çigerde häm kön tärtibenä yänä terrorğa qarşı köräş mäs''äläsen kütärde. İkeyaqlı söyläşülärdän soñ xäbärçelär qarşına çıqqan prezident Bush häm premyer-ministr Blair, üz illäreneñ terrorğa qarşı alıp barğan suğışta çigenmäyäçägen belderde. Tony Blair:

Audio, Tony Blair

"Bez tağın ber märtäbä şuşı terrorçılarnıñ törle cirlärdä yäşäwçe ğäyepsez keşelärgä häm bar yäşäw räweşebezgä nindi qurqınıç tudıruwın kürdek. Häm tağın ber märtäbä bez, terror qurqınıçı aldında bernindi dä çigenülär, bernindi dä kompromis bula almayaçağın qabatlarğa tieşbez" dip belderä britan premyer-ministrı Tony Blair. Ul şulay, "soñğı täräqqiat hiç kenä dä bezneñ Ğiraq eşläre belän şöğellänüwebezne kimetmäskä tieş, näq kiresençä, bu, terrorçılıqnı anda da tulısınça ciñü kiräklegeneñ ähämiaten kürsätä" dip äytte. Prezident Bush ta, Ğiraqta häm Äfğanstanda bergäläşep eşläwneñ terrorğa qarçı köräş öçen bik tä möhim buluwın bilgeläp ütte.

Audio, George Bush

"Bezneñ bergäläşep demokratiä xaqına Äfğanstan häm Ğiraqta eşläwebez dönyaküläm terrornı yuq itü öçen bik tä möhim. Şuşı xezmättäşlek alıp kilgän ömet häm ireklek cäyelderü kiläçäktä, terrornı tuqlandırıp torğan ömetsezlekkä wä näfrätkä qarşı köräşü ölkäsendä iñ ışanıçlı yul" di amerikan prezidentı. Ä inde anıñ räsmi säfär belän Londonğa kilüwen telämägännärneñ monı açıqtan-açıq uramnarda kürsätergä cıyınuwına kire qaytıp, alarnıñ İstanbul şartlawların beraz başqaçaraq bäyäläwen äytep kitärgä mömkin. "Suğışnı tuqtatığız!" digän törkem wäkile Lindsey German, "bez suğış aldınnan uq, Britaniä häm Amerikağa qarşı şundıy höcümnärneñ arta aluwı xaqında kisätkän idek" dip belderde. Anıñ fikerençä, alarnı, yäğni şundıy terror höcümnären barı tik, keşelärne bombalap tügel, ä säyäsi çişeleş ezläp kenä tuqtatıp bula.

Kärim Kamal, Praga
XS
SM
MD
LG