Accessibility links

Кайнар хәбәр

Udmurtiä respublikası İjaw şähären cämiğ mäçete qarşında meditsina xezmäte kürsätü noqtası açıldı


Ramazan ayında din qärdäşlärebez uraza totıp, ğibädät qılıp, igelekle eşlärne küpläp başqarırğa tırıştı. Ay buyına iftar aşları uzdırıldı. Aşlarnı äzerläw çığımnarın millättäşlärebez, qaysıber okruglardan saylanğan deputatlar üz cilkälärenä aldı. Şundıylardan, çärşämbedä 53nçe sanlı mäktäp aşxanäsendä millättäşebez «Blok» firması citäkçese İldus Märväretdin ulı Ğiläcetdinov oyıştırğan mäclesne bilgeläp ütärgä mömkin. İldus äfände İjawdağı mäçet tözeleşenä dä, milli çaralar oyıştırırğa da daimi yärdäm itep tora. Şulay uq İjaw şähäreneñ cämiğ mäçetendä dä kön sayın 300läp keşe iftar mäcleslärenä kilde. Din äxelläre belderüençä, bu aşlarğa mäçettän ber tien dä aqça totılmağan, milli canlı eşquarlar, din qärdäşlärebez rizıqlarnı üzläre mäçet aşxanäsenä kiterep, mäcles itkännär.

Bu atnada şulay uq Mojğa şähäre tatar ictimaği üzäge tırışlığı belän ölkän yäştäge din qärdäşlärebezne iftar aşına cıydılar. Kiäs rayonınıñ Tawcamal awılında, ütkän yılda xalıqtan cıyılğan aqçağa tözelgän mäçet qarşında, din qärdäşlärebezgä iftar aşına cıyılıp, wäğäz tıñlaw mömkinlege tudırıldı.

Şuşındıy iftar aşın Votkinsk tatar ictimaği üzäge dä oyıştırdı. Bu xaqta üzäkneñ räise Mäğsum Ğazimcanov.

Audio

Ramazan ayınıñ iñ qäderle bulğan — Qäder kiçäsenä bağışlap, ğädättägeçä, İjaw mäçetendä xatın-qızlar öçen ayırım uqular da oyıştırıldı, wäğäz dä tıñladılar.

Bıyılğı ramazan ayınıñ tağın ber yañalığı — İjaw mäçete qarşında ölkän yäştäge millättäşlärebez äçen şifaxanä eşli başladı. Anı «İxlas» xäyriä fondı, Udmurtiä tatar ictimaği üzäge, mäçet ähelläre bergäläp oyıştırdı. Älegä anda şäfqät tutaşı qabul itä, kiläçäktä tabiplar tabıp, xalıq meditsinasına nigezlänep, däwalaw alıp barılaçaq. Mäçet qarşında ni säbäple meditsina xezmäte kürsätü punktı açıluı turında tatar üzäge räise Fnyun Mirzayanov bolay dide.

Audio

İftar mäclesläre uzdırıla başlağaç, anda şähär sanitariä üzägennän aşlarnıñ sıyfatın tikşerüçelär kiräklege turında şart quydı, xalıq mäçetkä küpläp cıyılğan oçraqlarda da, qaysıber keşelärgä tabiplar yärdäme kiräk bula, şuña daimi eşläwçe punkt buldırunı maqsat itep quydıq

Ser tügel, soñğı yıllarda ölkän yäştäge apa-abıylarğa däwalanu maqsatı belän maxsus şifaxanälärgä urnaşu mömkinlege kimegännän kimi bara. Xäzer garantiälängän meditsina polisı bulsa da, şifaxanälärgä yatıp däwalanu öçen tağın küpmeder külämdä aqça tülärgä kiräk. Ä ölkän yäştäge apa-abıylarnıñ pensiä aqçasına anda däwalanıp bulmıy. Mäsälän, Udmurtiä respublikasınıñ İjaw şähärendäge kardiologiä üzägendä däwalanu öçen polis satıp alırğa kiräk, ä ul sigez meñ sumğa yaqın tora, ayına ike meñläp alğan pensiä aqçasına, älbättä, ölkännär bu polisnı satıp ala almıy. Ä inde tabip anda yullanma birgän oçraqta — här keşe uze belän barlıq daruların satıp alıp kilergä tieş, tüläwsez däwalanu ekstrennıy oçraqta — «aşığıç yärdäm» maşinası belän alıp kilsälär genä qaralğan. Şuña kürä ölkännär bügen üzläreneñ öylärendä genä däwalanırğa mäcbur. Mäçet qarşındağı punkt ölkännärgä berençe yärdäm kürsätep kenä çiklänmäyäçäk, şifaxanädä däwalanırğa kiräk bulğanda, alarnı kileşü buyınça anda urnaştıru mömkinlegen dä qayğırtaçaq, dip ışandırdı Fnyun Mirzayanov.

Xämidä Ğayfullina, Udmurtiä.

XS
SM
MD
LG