Accessibility links

Кайнар хәбәр

Röstäm Miñnexanov salımçılarnı qotladı...


Tatarstanda da 21nçe noyäber könne Salım häm cıyımnar idäräse xezmätkärläre könen bäyräm ittelär. Bu bäyräm Rusiä prezidentı qararı nigezendä 3 yıl elek buldırılğan ide. Bäyräm uñayınnan älege xezmätkä qağılışlı qayber sannar, salımçılarnıñ eşläreneñ näticäläre dä iğlan itelde. Tatarstanda Salım cıyu xezmätendä 4 meñ keşe eşli. Ağımdağı yılnıñ 10nçı ayında alar däwlät qaznasına 54 milliard sum aqça cıyğannar. Şularnıñ 26 milliardınnan artığı federal’ byudjetqa, 18 – respublika, ä qalğanı – cirle byudjetlarğa kitkän. Şulay itep, älege köndä salımçılar plannı xätta arttırıp ütäp, salım cıyu buyınça Rusiädä 7 urında toralar. Salım idäräse xezmätkärlären Tatarstannıñ premyer-ministrı Röstäm Miñnexanov ta qotladı. Xökümät kiläçäktä dä sezneñ näticäle eşegezgä ömet itep qala dielä qotlawda. Çınlap ta, älege xezmätneñ eşe naçar barsa, xökümätkä dä bik qıyınğa turı kiläçäk şul.

Comğa könne Qazanda Mäskäwdän kilgän Üzäk saylaw komissiäseneñ wäkile Yevgeniy Kalyuşin belän oçraşu uzdı. Anda Mäskäw wäkile üzeneñ Qazanğa kilüen ällä ni ğädättän tış närsä bulmawın äytte. Bu ğädäti çara, komissiä äğzäläre başqa töbäklärgä dä kittelär. Tatarstanda saylawlarğa äzerlek äybät bara dip belderde ul. 20nçe noyäberdä, inde xäbär itkänebezçä, Tatarstan Däwlät Şurasınıñ 20nçe sessiäse tämamlandı. Anda da saylawlar turında süz bardı. Läkin alar nigezdä 2004nçe yılda ütäçäk saylawlarğa bäyle ide. Deputatlar ber mandatlı saylaw okrugların raslaw turında qanunnı tikşerdelär. Şulay uq sessiädä Tatarstan respublikası prezidentın saylaw turındağı qanun da berençe uqılışta tikşerelde. Berençe uqılış kirtäsen Respublika xalıqları telläre turındağı qanunğa östämälär kertü xaqındağı qanun da ütte. Küräseñ, qanun bik centekläp äzerlängän bulğan. Anı täqdim itep çığış yasağan Zilä Wälievanı deputatlar sorawlar birep, tözätmälär kertep cäfalamadılar. Xäzer inde qanun 20nçe sessiäneñ çirattağı uqılışında ikençe uqılışta tikşereläçäk.

20nçe noyäber könne Bötendönya tatar kongressında ber qızıqlı çara uzdı. Anda tanılğan tatar ğälime häm cämäğät eşleklese Ğabdraxman Ğömärineñ şäxsi arxivın Tatarstannıñ Milli arxivına tapşıru kiçäse uzdı. Älege qızıqlı häm bik qimmätle dokumentlarnı ğalim 1933nçe yılda GULAG lagerlarında yuqqa çıqqannan soñ, anıñ onığı, Mäskäw däwlät universitetı dotsentı Şamil Ğömäri saqlap qala. Babasınıñ arxivın da ul üze tapşırdı. Pänceşämbe könne Tatarstanğa Ğabdraxman Ğomärineñ 46 qulyazması häm tatar, törek, ğäräp tellärendäge 100dän artıq basma äyberläre tapşırıldı. Alar arasında XIX, xätta XVII ğasırğa qarağan dokumentlar da bar.
XS
SM
MD
LG