Accessibility links

чәршәмбе, 7 декабрь 2016, Казан вакыты 21:41

Awılnıñ kiläçägenä ömetlänäse kilä


Ul'yan ölkäseneñ “Tuğan tel” idaräse üzeneñ soñğı utırışında, Damir Äminev täqdime buyınça, Pavlov rayonı Yevleyka awılı mäktäbenä Yaqup Kärimev isemen birü başlanğıçı belän çıqtı. Yaqup ağa 1941nçe yılda suğışqa kitär aldınnan 10 yıldan artıq mäktäp direktorı bulıp eşlägän. Ul şulay uq iñ möhim fännärne dä üze alıp barğan: ana tele, tatar ädäbiätı, tatar xalqı tarixı. Näq anıñ tırışlığı, anıñ tä'sire arqasında mäktäp çın tatar balaları tärbiälägän, anı tämämlawçılar arasınnan milli üzañı nıq bulğan türälär dä ölgergän.

Damir Äminev tä şul mäktäpne tämämlağan. Ğömere Tömän yaqlarında uzğan. Xäzer Sembergä qaytıp urnaşqaç, yıraq bulsa da, tuğan awılına yış qaytıp yöri. Qulınnan kilgänçä, kitaplar, metodik qullanmalar belän yärdäm itä. Mäktäp balaları belän oçraşular uzdıra, ana tele, tarixıbız buyınça bäygelär oyıştıra. Läkin ul üzeneñ mondıy eşçänlegeneñ näticäläre say buluğa xafalana. Rusiäneñ millätlärneñ tamırın qorıtu säyäsäte biredä dä milli xislärneñ sülpänäyuenä kitergän. Damir fikerençä, milli üzañnı torğızuğa, ana teleneñ abruyın kütärergä, bälki, olpat şäxesne iskä töşerü, anıñ turındağı yaktı xätirälär yärdäm itär ide.

Damir Äminev awılınıñ kiläçägenä ömeten özmägän. Mäktäp sabıylarınıñ “Tağın da kilegez abıy!” dip özelep toruları da şul ömetne nığıta. “Ömetsez şaytan ğına, ömet qalmasa, yäşäyeşneñ mäğnäse dä yuğala”, dip tä östäde “Tuğan tel” aktivistı Damir Äminev.

Ayrat İbrahim.

XS
SM
MD
LG