Accessibility links

Кайнар хәбәр

Ijaw şähärendä saylaw aldı macaraları däwam ıtä


Udmurtiä xalqı saylawlardan saylawlarğa qädär yäşi. Cirle üzidarä itü orğannarına, Ijaw şähäre dumasına, respublıka Däwlät Sovetına, bolar ütkän yılnıñ törle aylarında uzsa, bıyıl böten Rusiä töbäkläre belän bergä Däwlät Dumasına saylawlarda qatnaşaçaq. Saylaw macaraları tawış birü köne yaqınayğan sayın, qar öyermäse tägäräp artqan sıman, macaralar da kübäyep tora.

Ütkän yal könnärendä deputat mandatına iä bulırğa teläwçe kandidatlar nindi genä çaralarğa xalıqnı cälep itmäde. Canıñ ni teli. Şimbä könne İjaw şähäreneñ tatarlar kümäk yäşägän Lenin rayonında urnaşqan «Spartak» xalıq icat yortında Däwlät Dumasına kandidat Yevgeniy Bogomol'nıy, anı «Edinaya Rossiä» partiäse dä xuplıy ikän, tatar millätennän bulğan saylawçılar öçen konsert oyıştırdı. Tamaşada Çallı şähärendä yäşäwçe, Tatarstannıñ atqazanğan xalıq artistı Göldaniä Xäyrullina häm anıñ cır studiäse artistları qatnaştı. Zalda alma töşärlek tä urın yuq ide, konsertqa kilgän ölkän yäştäge apa-abıylar xätta ike säğät ayaq östendä basıp tordı. Döres, konsert küñelle buldı, ölkännärgä yäş çaqların isenä töşerep, Göldaniä Xäyrullina xalqıbız köylären dä, 50-60nçı yıllarda populyar bulğan cırlarnı da küp başqardı. Tamaşadan soñ, cırçı bolay dıde

Audio

«…gastrol' konsertlarına da xalıq şulay küpläp kiler dip ışanam…»

Şimbä, yäkşämbedä İjaw şähäreneñ iñ zur zallarınıñ berse — «İjstal'» sport kompleksında yäşlär öçen qızıqlı çara buldı. Biş meñ tamaşaçı populyar televizion «Çto, gde, kogda» uyının zäñgär ekrannan tügel, ä zalda qaradı. Bu çaranı SPS partiäse oyıştırğanı säxnäneñ ike yağındağı zur plakatlardan kürenep tora ide, älbättä, biletlar da buşlıy taratıldı. Uyında tamaşaçığa yaxşı tanış Aleksandr Druz', Maksim Potaşev, xättä yaqın häm yıraq çit illärdän dä wäkillär qatnaştı. Ul könne çit il wäkillärennän torğan häm Rossiä watandaşları komandaları yarıştı. Rossiä komandası sorawlarğa cawaplarnı tögälläräk birde, ciñüçelärne Rossiä energetikları başlığı Anatoliy Çubays üze qotladı. Annan soñ yäşlär yaratıp qabul itkän cırçılar — Maksim Leonidov, Aleksandr Dobronravov, Vladimir Kuz'min häm başqa artistlar çığış yasadılar. Yäşlär şaw-gör kilep yal itte. Zaldan ber yazma

Audio

Bu çara «İjstal'» sport kompleksında uzsa, İjaw şähäreneñ ikençe ber zalında fin-uğır yäşläreneñ etnofuturizm festivale bulıp ütte. Anda inde bötenläy başqa atmosfera ide. Säxnädän yäşlär häm ölkännär xalıq mädäniäteneñ nigeze bulıp torğan fol'klor cırlar başqardı. Şul uq waqıtta borınğı köylärgä nigezlänep, yaña cırlar da yazılğan, ul köylär dä tamaşaçıda cılı xatirälär qaldırdı. İnde konsert programmasınıñ soñğı qatnaşuçıları säxnädä, yuğisä festival'ne qararğa kiluçelär 12 säğät buyı çığışlarnı qarap ardı da, ämma zaldan ber genä keşe dä çığıp kitmi, haman ber genä buş urın da yuq. Yanımda utırğan ber apa cırnı cılıy-cılıy tıñlıy, anıñ xislären bulep berniçä soraw da birergä buldım.

Audıo

Dörestän dä yäşlär dä, urta häm ölkän buın wäkilläre dä festival'dän qänäğät. Üz fikerläre belän urtaqlaşıp, Aleksandr Yuminov, ul berniçä yıl elek awıl qarçıqları başqarğan cırlarnı yazdırıp, plastinka-taba da çığarğan ide, soñraq, borınğı cırlar tuplanğan zamança lazer tälinkä dä anıñ yärdämendä dönya kürde, ul festival'gä yuğarı bäya birde.

Audio

Aleksandr Yuminov belderüençä, festival'neñ möhimlelege — yäşlärneñ monda küp kilüe, alarda äbi-apalar başqarğan cırlarnı öyränep qalu teläge tuuı, dimäk borınğı mädäni ölgelär yuğalmas, buınnan buınğa küçep, däwam itär.

Bu festival'lär bezgä ölkännärne añlarğa etärgeç buldı, xalıq icatına, milli mädäniätebezgä, sänğätebezgä yaña qaraş tudırdı dip belderdelär yäşlär üzläre dä.

Şul uq waqıtta festival'dä milli kostyumnar paradı da, yaña ğına dönya kürgän fol'klor cırları tuplanması — ikençe lazer disknı da täqdim itü oyıştırıldı, foyeda dekorativ qullanma äyberlär satıp alırğa da mömkin ide.

Muzıykal' festival'lär İjawda däwam itäläçäk. 1nçe dekaberdän ber atna buyına teatr häm konsert zallarında İdel buyı häm Ural töbäkläre kompozitorlarınıñ äsärläre yañğırayaçaq. Kompozitorlar, muzıkantlar, tormıştağı finans awırlıqlar säbäple küp yıllar bu festival'ne uzdırudan tuqtap torırğa mäcbür bulğan, 16nçı muzıka festivalenä cıyılaçaq. İjawğa Qazan, Ufa, Saransk, Yoşqar-Ola, Çeboksardan kollektivlar kilüe kötelä. Festival'neñ programmasına Tatarstan häm Başqortstan kompozitorlarınıñ çığışları ayırım konsert itep quyılğan. Tamaşaçı Däwlätşin, Axiärova, Kälimullin, Kärimov häm başqa avtorlarnıñ äsärläre belän tanışa alaçaq.

Xämidä Ğayfullina, Udmurtiä.
XS
SM
MD
LG