Accessibility links

пәнҗешәмбе, 8 декабрь 2016, Казан вакыты 21:25

Saylawlarğa qädär kötelmägän xäl kilep çıqmasa, farazlar isbatlanırğa tieş


Saylaw aldı kampaniäse qızğannan qıza bara. Tawış birügä qädär qalğan şuşı atna, un köndä Tatarstan radiolarında, televidenie kanallarında säyäsi reklama yışraq çığa başladı. Sotsiologik tikşerenülär kürsätkänçä, ciñüçe firqälärne inde çamalap bulsa da, äle tawışnı kemgä birergä dip xäl itmägän keşelär dä şaqtıy.

Ğädättägeçä, Tatarstandağı sannar ğomum Rusiäneke belän çağıştırğanda, ez genä bulsa da ayırılıp tora. Cämğiät fikeren böten Rusiä tikşerenülär üzäge iğlan itkän mäğlümatlarğa qarağanda «Berdäm Rusiä» firqäse alda bara. Anıñ öçen keşelärneñ - 20 % tawış birer ide, annan soñ 10% yaqın saylawçı kommunistlarnı yaqlar ide, annan soñ «LDPR», häm « Uñ köçlär» belän «alma»çılar bara. Tatarstanda da şul uq tärtip saqlansa da, sannar beraz ğına ayırılıp tora. Bu xaqta bezgä analitik ezlänülär häm eşlär üzäge citäkçese Salagayev Aleksandr Leonid ulı söyläde. Anıñ äytüenä qarağanda, törle säyäsi firqälär, Mäskäwdäge berniçä ere tikşerenülär üzäkläre quşuı belän, Qazandağı şuşı oyışma ber niçä kön elek saylawçılar fikeren soraşıp çıqqan. Soraştıru näticälärenä qarap, tübändäge faraz qorıp bula.:.

Berdäm Rusiä – 30%

Kommunistlar firqäse – 20-25%

LDPR – 6%

Aleksandr Salagayev fikerençä, tawışnı kemgä birergä äle xäl itelmägän 14% saylawçı bar. Alarnıñ tawışları töp isemlektäge tärtiptä bülenep betärgä mömkin. Aleksandr Salağayev citäkçelegendäge analitik tikşerenülär üzäge xäbärençä, tağın 4 % saylawçı bötenesenä dä qarşı tawış birergä isäpläp tora. Ğomum sannar yuğarı bulğanda, Tatarstanda 5%lıq kirtäne 3 firqä genä tügel, tağın berniçä säyäsi oyışma da ütä ala dip farazlana.

Tikşerüçelär fikerençä, ägär saylawlarğa qalğan 12 kön eçendä berär ğauğalı, kötelmägän xäl kilep çıqmasa, farazlar isbatlanırğa tieş.

Aleksandr Salagayev bilgeläp ütkänçä, küpçelek saylawçılar, tege yäki bu firqäneñ säyäsi programmasın da, eşlägän eşlären dä tögäl genä belmi. Küpçelek xalıq, nindi säyäsätçelär barlığın televidenie kürsätkän räsemnärdän genä çamalıy.

Duma saylawlarınnan ayırmalı bularaq, Tatarstandağı Däwlät Şurası saylawlarında, töp rol`ne firqä häm programmalar tügel, ä nämzätlär üzläre, alarnıñ ni däräcädä xalıq arassında tanılğan häm xörmätkä layıq buluı uyınıyaçaq.

Bikä Timerova.

XS
SM
MD
LG