Accessibility links

пәнҗешәмбе, 8 декабрь 2016, Казан вакыты 07:07

Gruziädäge soñğı waqiğälär - elekke oppozitsiä prezident saylawlarına berdäm nämzät çığara


Elekke prezident Eduard Şevardnadzene xakimiattän çitlätügä ireşkän Gruziä oppozitsiäse kiläse prezident saylawlarında Mixail Saakaşvili tiräsendä berläşüwen xäbär itte, xörmätle tıñlawçılar. Şulay itep Gruziä xakimiat bilgesezlege çorınnan äkrenläp kiläçägen oyıştıru eşenä kereşä.

Gruziäneñ waqıtlı däwlät başlığı Nino Burcanadze çärşämbe könne Şevardnadzegä qarşı çıqqan häm anı xakimiattän çitlätügä ireşkän oppozitsiä partiäläreneñ kiläse saylawlarda prezidentlıqqa Mixail Saakaşviline täqdim itüwen belderde.

Audio, Nino Burcanadze

"Bez kiläse prezident saylawlarına berdäm nämzät belän çığu turında qarar qabul ittek, bez berdämlek xaqına bar qarşılıqlarnı da çitkä quyunıñ ifrat da möhim buluwına ışanabız häm saylawlarda berdäm nämzät bezdän Mixail Saakaşvili bulaçaq" di Gruziäneñ xäzerge waqıtlı citäkçese Burcanadze. Ğinwarnıñ 4-enä bilgelängän şul saylawlarğa nämzätlär kürsätü inde çärşämbe könne ük tämamlana. Normal'' şartlarda oppozitsiägä urtaq nämzät çığaru öçen kimendä berniçä ay buyı bergä eşläw, üzara kileşü häm qaraşlarnı kileşterü kiräk bulır ide. Ämma Gruziädäge soñğı waqiğälär, oppozitsiäneñ Eduard Şevardnadzegä qarşı çığuwı häm näticädä anı çitläşterü ozın-ozaq kiñäşläşülärgä waqıt qaldırmadı, şuña da oppozitsiäneñ Saakaşvili, Burcanadze häm Zurab Jvaniä citäklägän törkemnäre prezident urınına, Tbilisidäge waqiğälärdä äwzem qatnaşqan häm kiñ tanılğan Mixail Saakaşviline täqdim itte. Ul şunda uq üzeneñ köräşkä äzer buluwın belderde.

Audio, Mixail Saakaşvili

"Min Gruziädäge prezident saylawların ciñärgä äzer. Häm bez kiläse parlament saylawlarında da zur küpçelek qazanırğa äzerbez. Anda nämzätlärebez isemlege başında Gruziäneñ iñ kürkäm säyäsi yöze Nino Burcanadze toraçaq" di çärşämbedä Gruziäneñ prezidentlığına nämzät itep kürsätelgän Mixail Saakaşvili. Jvaniä isä elekke oppozitsiäneñ şuşı berdämlegen şundıyraq wäğdä belän nığıttı.

Audio, Zurab Jvaniä

"Saylawlarğa qädär qalğan 40 könne bez Gruziädä 4-nçe ğinwardan soñ nindi çaralar kürü programmasın qoru öçen faydalanaçaqbız" di Zurab Jvaniä. Ä inde elekke prezident Eduard Şevardnadzegä kilgändä, çärşämbedä ul urınınnan kitüwe turında beldergännän soñ berençe märtäbä üz idaräsendä bulıp, anda üze belän eşlägän xezmätkärlärgä räxmäten äytep, üz şäxsi äyberlären alıp kitte. Berük waqıtta ul Gruziädän Germaniägä küçep kitüwe turındağı imeş-mimeşlärne kire qağıp, üz ilendä qalaçağın häm prezident urınınnan waz kiçüwenä kitergän xällär turında maxsus yazma äzerliäçägen xäbär itte. Mäğlüm ki, Germaniä, ägär dä Şevardnadze teläk beldersä, anı üzendä qabul itärgä äzer toruwın äytkän ide.

Kärim Kamal, Praga
XS
SM
MD
LG