Accessibility links

шимбә, 10 декабрь 2016, Казан вакыты 08:14

Mädäniät xäbärläre


Tatar mädäniät tormışı soñğı könnärdä yubileylarğa bay buldı.

K.Tinçürin isemendäge drama häm komediä teatrı binasında Tatarstannıñ xalıq yazuçısı , tarixi romannar avtorı Nurixan Fättaxnıñ 75 yäşlek yubileye uzdırıldı. Kiçädä, küpyıllıq näticäle xezmäte,tatar telen häm mädäniäten saqlawğa häm üsterügä layıqlı öleş kertkäne öçen aña Mintimer Şäymievnıñ “Räxmät xatı” tapşırıldı.

Bu atnanıñ düşämbe könendä G. Qamal isemendäge tatar däwlät akademiä teatrı artistkası Zölfirä Zaripovanıñ yubileye uñayınnan icat kiçäse uzdı.

Tatarstannıñ Däwlät büläge,Tuqay bülägenä layıq şağir, G.X.Andersen isemendäge xalıqara Maqtawlı büläk alğan balalar yazuçısı, Şäwkät Ğalievqa 75 yäş tuldı. Anıñ 70nçe yıllarda uq kompozitor Rim Xäsänev belän icat itkän“Qıñğırawlı mäktäp yılları” cırı xalıq arasında äle dä bik populyar. Ul üzeneñ yubileyen tuğan yağı Apas rayonında dekaberdä uzdırırğa cıyına.

Tatar mädäniätendä zur urın alıp torğan, ämma bügen bezneñ aradan kitkän şäxeslärne iskä alu kiçäläre dä ğibrätle ütte. 20nçe noyäberdä kompozitorlar soyuzı binasında tatar xalqı professional' muzıykasınıñ nigezen saluçılarnıñ berse bulğan, tanılğan kompozitor, Tatarstan gimnı avtorı Röstäm Yaxinnı iskä alu kiçäse uzdı. Bu kiçägä Röstäm Yaxinnıñ icadi dusları - cırçılar , kompozitorlar, xezmättäşläre, häm ğomumän anı bik yaqın belgän , anıñ muzıykasın , moñın yaratqan dus-işläre cıyılğan ide.

Kiçäne muzıyka belgeçe Klara Tacieva alıp bardı.

Kiçä, Röstäm Yaxinnıñ üze isän çaqta kassetağa yazdırıp qaldırğan “Lya bemol' major prelyudiä”sen tıñlawdan başlandı. Kiçädä Mönirä Bulatova, Yoldız Burnaşeva, Mirsäit Yarullin, Emil' Cäläletdinov, İldus Almazov häm İldus Sadıyqovlar çığış yasadı. 3nçe muzıyka mäktäbe uqıtuçılarınıñ qıllı kvartetı Röstäm Yaxinnıñ muzıkasın uynadı.

Röstäm Yaxinnı iskä alu kiçäse şulay uq Qazan däwlät pedagogika universitetınıñ muzıyka fakul'tetında şimbä könne uzdı.

Küñelne ärnetkän qayğılı xäbärlär dä bar. Bezneñ aradan kitkän kompozitorlar arasında inde Zinnur Ğibadullin da bar. Tatar cırın üsterüdä zur öleş kertkän kompozitor Zinnur Ğibadullin uzğan atnada wafat buldı. Ul icat itkän “Tägärmäçlär”, “Minutlarnı nik sanıysıñ” kebek cırlar yöräklärgä bik tiz ütep kerep, xalıq küñelendä saqlana.

Ä tatar estradası nindi xäldä ikän disägez, 9,10,11nçı ğinwarda uzaçaq teleradio “Tatar cırı - 2003” bәygesenә äzerlek başlandı. Tatar yäşläre “Piramida” mädäni-küñel açu üzägen yawlıylar. Anda estrada yoldızları konsetların Bars-Rekords kompaniäse uzdıra. Uzğan atnada Liliä Xämitova iñ berençe häm berdänber “Sınatmasın yörägem” dip isemlängän konsertı belän tamaşaçı aldında imtixan tottı.

Teatr dönyasında G.Kamalda “Qazan sölgese” belän “Şulay buldı şul” spektakl'läre säxnädän töşmi. Yäşlär teatrında R.Batullanı bik yarattılar. Anıñ “Şüräle” spektakle bu atnanıñ 26nçı noyäberdä çärşämbe könne buldı.

Bu atnada uzğan Ramazan bäyräme könnärendä 26nçı noyäberdä kiç belän “Qazan” milli mädäni üzägendä “Qazan nurı” isemle Räsim Şämsetdinov citäkçelegendäge xalıq uyın qoralı orkestrı konsertı bula.

25nçe noyäber könne TRsı Milli muzeynıñ ädäbi qunaqxanäse çirattağı utırışın ütkärde.Anda “Tormış çoñğılları” dip atalğan oçraşuda tanılğan tatar yazuçısı Mösäğit Xäbibullin buldı. Ädäbiätqa 60nçı yıllarda kilep kerep mäxäbbät, äxlaq temaların kütärep,70nçe yıllarda awıl tormışı temasın quzğatsa, 80nçe yıllarda “Qubrat xan” romanı belän tanıla. Aldağı könnärdä “Şäytan qalası”, “Söembikä xanbikä häm Yawız İvan” digän äsärläre dönya kürä. 2003nçe yılda ul Tuqay bülägenä layıq bula.

26nçı noyäber könne S.Säydäşev muzeyında tanılğan dirijer, skripaçı, möğallim İl'yas Äwxädievne iskä alu kiçäse uzdı. Berençe adımnarın ul skripaç bularaq başlasa, soñraq, Fänis Yärullinnıñ “Şüräle ” baletı belän berençelärdän bulıp dirijerlıq itä. Anıñ täqdime belän konservatoriä häm muzıyka uçilişçesınıñ student orkestrları nigezendä Tatarstan däwlät filarmoniäseneñ simfonik orkestrı oyıştırıla. Qazan muzıyka uçilişçesınıñ tatarlardan bulğan berençe direktorı da ul.

Azatlıq radiosı, Mälikä Basıyr, Qazan.

XS
SM
MD
LG