Tatarstanda da xalıq telendä saylawlar. Respublika citäkçelegeneñ Rusiä Duması saylawlarında aktiv qatnaşuı protsessnı aktualläşterä häm kiskenläşterä. Monı Rusiäneñ Üzäk saylaw komissiäse wäkile dä tanırğa mäcbür buldı. Monnan ber atna çaması elek Üzäk saylaw komissiäse äğzäse Yevgeniy Kolyuşin Tatarstandağı saylaw aldı wäzğiäte belän tanışqaç jurnalistlarğa “Tulayım wäzğiät tınıç, ämma eçke kierenkelek bar. Miña biredä administrativ resurs bik zur bulıp toyıla digän” ide. Äye administrativ resurs bik zur häm anı yäşerep tä tormıylar. Äle monnan ber atna çaması elek kenä räsmi mäğlümat çaralarında “Единая Россия” firqäseneñ yuğarı şurası räistäşe Mintimer Şäymiev, fälän cirgä barğaç fälän närsä büläk itte, äytik Möslimdä açılğan yaña mäktäpkä 11nçe kompyuter büläk itte dip açıq itep xäbär itelä ide. Yäğni monıñ saylawlar turındağı federal' qanunnı bozu bulıp qabul itelergä mömkinlegenä iğtibar da itelmi ide. Soñğı könnärdä genä bu xata tözätelep Sarmandağıça- “büläklärne räistäş yanındağı berär ministr tapşırdı” dip xäbär itelä başladı. Şulay uq “Единая Россия” firqäse äğzäse ber mandatlı okrugtan çığuçı ber nämzätneñ buşlay sıra häm aqça öläşüe, yäğni saylawçıları satıp alu belän şöğellänüenä xalıqtan kilgän signallarğa xoquq saqlaw oyışmalarına iğtibar itmäskä kürsätmä birelgän digän ğäyre räsmi xäbärlär dä bar. Ä menä ber nämzätneñ tele debat waqıtın da isemnären äytep Eçke eşlär ministrlığı citäkçelegen ike yözlelektä ğäyepläwenä räsmi reaksiä özleksez buldı. Ministr räsmi mäğlümat çaralarına älege nämzätkä qarata yala yağuda ğäyepläp cinayät eşe quzğatıluın belderde. Saylaw aldı kompaniäseneñ tağı ber yañalığı kierenkelekne arttırmıy arttıruın. Kiresençä kimetä genä kebek. İdel buyı saylaw okrugınnan nämzät bulıp terkälgän Aleksandr Ştanin räsmi räweştä “Soyuz pravıyx sil” firqäse quşuı buyınça däğwäçelär isemlegennän çığuın belderde. Läkin ğäyre räsmi çığanaqlardan belengänçä älege qarar aña citkerelgäç Aleksandr Ştanin isemlektäge demokratik yünäleştäge firqälärdä torğan ber-niçä nämzätkä üz-ara ğına praemreliz saylawlar yäğni saylaw aldı saylawları ütkärergä häm ciñüçene genä qaldırırğa täqdim yasağan. Şulay itep ul üzeneñ kitäsen belä torıp, üze belän tağı ber real' nämzätne alıp kitärgä telägän. Bu inde “СПС” firqäse kürsätmälären arttırıp ütäw bulır ide. Häm saylaw aldı wäzğiätenä qağılışlı soñğı häm ğäyre räsmi yañalıq. Şuşı könnärdä Qazanda “Единая Россия”dän başqa barlıq firqälär yäşeren cıyılış ütkärgännär. Monda ber mandatlı okruglardan çığuçı qaysı nämzätne xuplaw mäs`äläse xäl itelgän. Ber genä yä bulmasa ber-niçä nämzätne genä xuplarğa kileşä almağannar. Ä menä “Prezident belän bergä ciñäbez” digän şiğär kütärep yörgän firqä nämzätlärenä yaqtı çıray kürsätmäskä kileşelgän. Menä şundıy kierenkelek “Azatlıq” radiosınıñ uzğan tapşıruında yañğırağan komentariynı raslıy da inde. Tatarstanda “ayaqlar belän tawış birüçelär” yäğni saylawlarğa barmawçılar häm “Barısına qarşılar” “firqäsenä” yäğni barlıq nämzätlärgädä qarşı tawış birergä cıyınuçılar firqäsenä yazıluçılar sanı artu farazları raslana. Qazanda inde älege “firqäne” isemlekkä 22 itep kertep anıñ öçen agitatsiä alıp barırğa äzer keşelär dä bar ikän.
Qısqaça köndälek yañalıqlarnı däwam itep beraz Qazandağı xällär turında. Çärşämbe könne Rusiäneñ zapastağı ofitserlar cämğiäteneñ Qazandağı ofisında 3 ofitser çiklänmägän açlıq iğlan ittelär. Qazanda yäşäwçe 1300 zapastağı ofitser monnan ber yıl elek armiä birgän sertifikatlarına toraq tözü üteneçe belän respublika citäkçelegenä möräcäğät itkännär. Röxsät alğaç tözeleş belän şöğellänüçe däwlät çinovnikları ofitserlar öçen yort saldırtırğa kereşkännär. Yort äzer digändä genä fatirlar kötkän ofitserlarğa “sezneñ sertifikatta kürsätelgän aqçalarığız citmi, yaña fatir alasığız kilsä östämä tülägez dip beldergännär. Rusiä armiäse ofitserları “bezne Tatarstan çinovnikları aldadılar” dilär.
1552nçe yılda Qazannı yaqlağanda şahit bulğan babalarıbızğa häykälneñ yaña proyektı täqdim itelde. Proyektnıñ avtorları rässam Niäz Xaciäxmätov, arxitektor Svetlana Mäwlieva häykälne uzğan, xäzerge häm kiläçäk zamannarnı simvollağan 3 stella räweşendä surätlägännär. Stellalar bergä quşılıp şatır xasil itälär. Şatır başında gömbäz. Stellalarğa “Tuğan tufrağım öçen meñ ğömeremne birergä äzermen, ä watanım öçen soñğı tamçı qanımnı”-dip yazıp quyılaçaq.Yunıs Ätnäle.
