Accessibility links

сишәмбе, 6 декабрь 2016, Казан вакыты 11:19

Acarstan citäkçese Tbilisidağı yaña xakimiätkä buysınırğa cıyınmıy


Aldağı tapşırularda söylägänebezçä, Gruziäneñ yaña xakimiäte aldında torğan töp mäsälälärneñ berse – ilneñ bötenlegen saqlap qalu bulaçaq. Tbilisidan möstäqillek dawlağan 3 respbulika, Abzaziä, Könyaq Osetiä häm Acarstan citäkçeläre bu könnärdä Mäskäwdä söyläşülär alıp bara. Çärşämbedä Acarstan başlığı Aslan Abaşidze Gruziäneñ yaña xökümätenä buysınmayaçağın belderde

Şuşı 3 töbäkneñ ikese, Abxaziä belän Könyaq Osetiä, Rusiä çigendä urnaşqan. Alarnıñ Rusiägä quşılu ixtimalı turında süzlär inde küptännän yöri. Bu käyeflär töbäklärneñ üzlärendä dä bar, Mäskäwdä dä bu adımğa öndäwçelär citärlek. Misal öçen, atnakiç könne LDPR citäkçeläreneñ berse Aleksei Mitrofanov Abxaziä belän Könyaq Osetiäne Rusiägä quşu mäsäläsen Dumanıñ comğa utırışında tikşerergä täqdim itte.

Möstäqillek däwalağan 3nçe töbäk, Acarstan, Törkiä çigendä urnaşqan. Ni barı 400 meñ xalqı bulğan Qara dinñez buyındağı bu respublika inde 1991 yıldan birle möstäqil yäşi diergä bula. Anıñ üz ğäskäre bar, ul üzäk qaznağa salım tülämi. Respublika başlığı Aslan Abaşidze Tbilisida bulğan soñğı xällärne "mäsxäräle fetnä" dip atadı häm Gruziä belän çiklären yabıp quydı. 4 ğinwar saylawları ütmi torıp, ul bu yaña xakimiätkä buysınmayaçağın belderde. Xakimiätkä köç belän kilgän keşelärneñ, başqalarğa, bigräk tä qanuni räweştä saylanğan citäkçelärgä färman birü xoquqı yuq, dide ul.

Bu süzlär berençe çiratta älbättä, Gruziäneñ yaña prezidentı bulır dip kötelgän opozitsiä citäkçese Mixail Saakaşviliğa qarap äytelgän. Saakaşvili berdäm Gruziäne saqlap qalu tarafdarı bularaq mäglüm. Qayber küzätçelär anıñ prezident bulğaç, möstäqil respublikalarğa qarata qırısraq säyäsät alıp baraçağın farazlıy. Çärşämbedä Tbilsida ütkän matbuğat oçraşuında Mixail Saakaşvili, Acarstan mäsäläsenä qağılıp bolay dide:

Audio (Mixail Saakaşvili)

"Acarstan mäsäläsenä kilgändä, ul tınıç yul belän xäl iteläçäk. Acarstannı berkem dä Gruziädän ayırıp ala almıy. Bu axmaq ber närsä, äytik, Tbilisinıñ ber bistäse üzen bäysez dip iğlan itü kebek. Mondıy närsä mömkin tügel."

Acarstan citäkçese Aslan Abaşidze turında Saakaşwili bolay dide:

Audio (Mixail Saakaşvili)

"Acarstanda bernindi milli qarşılıqlar yuq. Anda barı tik mine yaratmağan citäkçe bar. Şunnan ni? Ul mine yaratmıy, ä min anıñ diktator häm avtoritar alımnarın yaratmıym. Läkin bu söyläşülär bulmasqa tieş digän süz tügel. Söyläşülär bulaçaq, häm dä tınıç çişeleş bulaçaq."

Gruziäneñ yaña citäkçeläre belän söyläşü ixtimalı turında Abaşidze üze bolay dide:

Audio (Aslan Abaşidze)

"Min härkem belän oçraşırğa äzer. Xättä qulına watıq şeşä totqan cinäyätçe belän. Läkin, min alarnıñ fikeren urtaqlaşam digän süz tügel. Bu keşelärneñ ilgä yamanlıqtan başqa berni eşlägännäre yuq."

Bu süzlären Abaşidze çärşämbe könne Mäskäwdä Rusiäneñ premier-ministrı Mixail Kasyanov belän belän oçraşqaç äytte. Acarstan başqalası Batumida Rusiäneñ berniçä xärbi berämlege urnaşqan: şul isäptän 145 uqçı diviziä, 115 tank batalionı. Aslan Abaşidze süzlärençä, bu xärbilärneñ 70 protsentı acarstanlılar häm alar Respublikağa qarşı köç qullanu bula-qalsa, üz yortın saqlarğa äzer. Alay da Abaşidze eş moña barıp citmäs dip ışana. Atnakiç könne Mäskäwdä Abxazia, Könyaq Osetiä häm Acarstan citäkçeläreneñ 3yaqlı söyläşüläre ütä. Comğa könne alar qabat Rusiä räsmiläre belän oçraşa.

Ali Gilmi, Praga
XS
SM
MD
LG