Accessibility links

Кайнар хәбәр

Moldova Dnestr buyı mäs'äläsendä Rusiä täqdim itkän tınıçlıq planın kire qaqtı


Moldovanıñ kommunist prezidentı Vladimir Voronin Rusiä täqdim itkän tınıçlıq planı Dnestr buyı töbägen xalıqara tanılğan däwlät itüne küzdä tota dip ul plannı kire qaqtı. Voronin televideniegä interviewda kileşügä soñğı minutta kertelgän tözätmälärdä Moldovanıñ Dnestr buyı Respublikası turında süz bara dide. Anıñ äytüençä, bu kileşüne imzalaw separatist Dnestr buyı Respublikası bäysezlegeneñ Kişinev tarafınnan tanıluın añlataçaq. Voronin kileşüne imzalawdan baş tartuğa şulay uq, anda Russiä ğäskärläreneñ separatistlar telägänçä töbäktä tağın 30 yıl buyı toraçağı turında äytelüne säbäp itep kiterde. Voronin Dnestr buyındağılar Yewropada İminlek wä Xezmättäşlek Oyışması citäkçelegendäge tınıçlıq köçlärneñ kertelüen telämäde dide. Voronin äytüençä, Mäskäw kileşüneñ aşığıç räweştä imzalanuına ireşergä teläp aña basım yasağan. Kişinevta studentlar häm oppozitsion säyäsätçelär citäkçelegendä inde 3-nçe kön bu planğa qarşı demonstratsiälär ütte. Bügen anda 3 meñläp keşe qatnaştı. Yewropa Berlege, NATO, AQŞ häm Britaniä älämnären kütärgän demonstratsiäçelär Moldova xökümäten urınınnan kitärgä çaqırdı.
XS
SM
MD
LG