Accessibility links

шимбә, 3 декабрь 2016, Казан вакыты 09:45

Xikmätle xällär


Bu könnärdä saylawlarğa bäyle bulmağan xikmät yuqtır. Qar yawsa da, yawmasa da, uram çistartılsa da, çistartılmasa da – anıñ artında saylaw häm nindider nämzätneñ mänfäğäte bar. Xätta Uraza bäyräme dä saylaw aldı çorına turı kilde disäñ – Ramazan ayınıñ üz kalendare. Döres, Ğäid el' fitr könendä mäçet tiräsendä mulla, möädzinnär genä tügel, deputat bulırğa telägän abzıylar böterelde. Qazanda ataqlı oçuçı häm faşistlar konslagerınnan Xeynkel oçqıçın alıp qaçqan çın qaharman, mordva keşese Mixail Devyataevqa häykäl quyıldı. Ul da, anıñ yaqınnarı da saylawda qatnaşmıy. Devyatayevnıñ gitlerçılar oçqıçın eläkterep sigez äsir belän bergä qaçıp qaytuı üze ber xikmät. Läkin xikmät anda ğına tügel äle. Devyataev näq şul eşläre öçen başta törmägä utırtıla, lager'gä cibärelä, annarı näq şul uq ğämäle öçen geroy isemenä häm Altın yoldızğa layıq bula. Menä añla sin säyäsi sistemanıñ mantıyğın. Kem qaharman da, kem doşman. Bik yış qına doşmannar qaharman, yaqtı yoldızlar tübän zat, tübändä, pıçraqta aunağan närsä altın, bällür digäne pıyala, doşman digäne tuğan, ä dus digäne xıyänätçe bulıp çığa qayçaqta.

İñ xikmätlese – 7nçe dekaber ütkäç niçek yäşärgä? Äytik, Başqortstan prezidentı saylawları ütep kitkäç. Nindider oligarx digän qurqınıç canwar belän qurqıtular bulmasa, bu xalıq niçek yäşär ikän? Änä, comğa könne İnternet qullanuçılar “Oligarxnı üter!” digän uyın quyılğan säxifä adresı aldı. Uyın programmasın açqaç, qapçığın kütärgän Veremeyenkonı körtlek atqan kebek atıp uynıy torğan programma bulıp çıqtı bu. İnde xäzer telefil'mda ğına tügel, ä saylaw aldı bäygesendä keşe üterüne ğädätkä kertergä tırışalar. Xoday kiçerer mikän mondıy näfrät ürçetüçelärne?

Äye, Başqortstanda prezident saylaw mädäni häm ädäple säyäsi bäxäs bulıp çıqmadı. Oppozitsiäne, xakimiätne tänqitläwçelärne tür başına tügel, işek töbenä yaqın da cibärmädelär. Häm şuşı näfrät häm täxetkä yabışu üze ber xikmätkä äwerelde. Xätta, satira-yumor da räsmi rejimnı saqlawğa xezmät itä ala ikän. Äytik, Ufadan şundıy mäzäk kilep citte. Ägär dä mägär Ralif Safin Başqortstan prezidentı bulsa, imeşter yaña açılğan “Nur” teatrın Alsu Safinanıñ cır teatrına äyländerälär häm imeşter ägär prezidentlıqqa Sergey Veremeyenko ütsä, “Nur” teatrı Peterburgtağı “Leningrad” rok-törkemenä birelä, yäğni bik qatı sügenüe belän yamanatı çıqqan Şnurğa bireläçäk. Läkin şunısı xikmätle. Saylawğa 10 kön qalğanda da şuşı kandidat saylaw byulletenenä kertelmägän ide. Ralif Safin kebek ük Sergey Veremeyenko da xalıq belän oçraşu öçen tınıç urın taba almadı. Yä binası bulmadı, yäki bulğan binada ut sünde, yäisä bötenläy yozaqqa bikläp quyıldı. Läkin monda bernindi dä xikmät yuq. Härwaqıttağıça säyäsät, barı tik mänfäğät kenä. Ä bu inde xikmättän dä zurraq närsä.

Rimzil Wäli

XS
SM
MD
LG