Accessibility links

шимбә, 10 декабрь 2016, Казан вакыты 21:29

«Tatar kongressı» tatar oyışmaları berdämlegenä tağın 6 milli cämğiät östälde


Tatar kongressı başqarma komitetı yıl näticälären bilgeläw çarasın şulay zurlap inde 2nçe tapqır ütkärä. Şuşı cıyılışqa Rusiä töbäkläre wäkilläre genä tügel, Bäysez Däwlätlär Berläşmäsenä kergän illärdän dä tatarlar çaqırıldı.

Başqarma komitetnıñ kiñäytelgän utırışı, digän çara Milli mädäni üzäk binasında ütte. Anda başqarma komitet äğzäläre, respublikanıñ törle töbäktäge wäqälätle wäkilläre, cämäğät eşlekleläre qatnaştı. Prezident apparatı isemennän Äğzam Ğöbäydullin buldı. Şulay uq, Yaroslavl ölkäse gubernatorınıñ urınbasarı kilep, ölkä başlığınıñ säläm xatın uqıdı. Cıyılışnı Bötendönya tatar kongressı başqarma komitetı citäkçese Rinat Zakirov açtı. Üzeneñ çığışında ul, Kongresstan soñğı yılda bulğan üzgäreşlär, qılğan ğämällär turında qısqaça söyläp kitte. Tatarlar yäşägän töbäklärdä tatar mäktäplären açu häm bulğannarın saqlap qalu xäzer kön qadağına suğa torğan iñ aktual problemalarnıñ berse, dide ul.

Rinat Zakirov eşlägän eşlär turında söylägändä, Kongressnıñ çittäge tatarlardan 66 balağa Tatarstan yuğarı uqu yortlarına kerergä yärdäm itüen atadı. Şulay uq, ul tatar oyışmaları arasında üz ara elemtälärne nığıtu öçen, iğtibarnı kübräk internet çeltäre aşa kompyuterlaştıruğa yünältergä täqdim itte.

Cıyılışta şulay uq Belorus tatarları üzäge başlığı Abu-Bäker Şabanoviç çığış yasap, Belorus häm Pol’şa tatarlarınıñ din nigezendä millätne saqlap qalırğa tırışuları turında söyläde. Tışqı elemtälär ministrlığı wäkile AbdraxmanovAydar äfände respublikanıñ çittäge säwdä wäkilläre belän eş näticäläre belän tanıştırğannan soñ, zal şaqtıy canlanıp kitte.«İqtisadıy bağlanışlarnı üsterü yünäleşendä eş sülpän bara» digän tänqit tä yañğıradı, eşmäkärlär üzläre dä, torıp basıp, «Qazan yağınnan teläktäşlek bik sizelmi», dip fikerlären belderde.

Sarıtaw milli oyışması wäkile Zöfär Xakimovnıñ çığışı isä, küplärneñ käyefen kütärde. Ul, tatarlarnı canisäptän soñ açıqlanğan ciñü belän qotlawdan başladı. Ä ciñüne, Zöfär Xakimov, millättäşlärebezneñ san belän Rusiädä ikençe urınnı saqlap qaluında kürä. Millät aldında torğan ikençe zur mäs’älä itep, Sarıtaw wäkile, Duma saylawların atadı häm zalda cıyılğannarnı üz millättäşlärebez öçen tawış birergä çaqırdı.

Tağın ber möhim waqiğa da buldı bu cıyılışta. Tatar kongressına kergän 130 oyışmağa tağı 6 tatar cämğiäte quşıldı. Başqarma komitet äğzäläre Orenbur häm Vladimirdağı 2 yäşlär oyışması, Komidağı milli-mädäni avtonomiä, Krasnodar ölkäseneñ tarix-etnografiä klubı, Tömändäge tatar mädäniäte fondı häm Donetskiy ölkäseneñ tatar-mädäni üzägen qabul itü öçen tawış birde.

Başqarma komitetqa da üzgäreşlär kertelde. Elekke Çallı başlığı Räşit Xämädiev urınına, idärägä Aznaqay başlığı Änäs İsxaqov saylandı.

Bikä Timerova

XS
SM
MD
LG