Accessibility links

Кайнар хәбәр

Amerikannar belän bäreleşlärdä Saddamnıñ fidain ğäskärläre kiemen kigän suğışçılar kürenä başladı


Uzıp itkän noyäbr ayı Ğiraqtağı çit il ğäskärläre öçen iñ qanlısı buldı, xörmätle tıñlawçılar. Elek höcümnär ara-tirä häm ayırım ğäskärilärgä genä yasalsa, xäzer inde utqa eşmäkärlär, sivil xezmätkärlär, xätta diplomatlar da totıla. Düşämbegä qarşı töndä üzäk Ğiraqtağı Samarrä tirälärendä bulğan bäreleştä amerikannarğa höcüm itüçelär Saddam köçläre kiemnären kigän ide dip xäbär itelä.

Yäkşämbedä Samarrä şähärendä bulğan şuşı bäreleş ildä Saddam bärep töşerelgännän birle iñ zurısı bulıp tora. Älegä qädär amerikan köçläre bu däräcädä oyışqan qarşılıqqa oçrağanı yuq ide äle. Şähär aşa uzıp barğan amerikan xärbi kärwanına 100-läp ğiraqlı uramnıñ ike yağınnan da yort tübälärennän ut açqan, Quşma Ştatlarnıñ xärbiläre moña tank häm tup utı belän cawap qaytarırğa mäcbür qalğan häm şaqtıy ozaq barğan şuşı atışlarda, törle çığanaqlarğa qarağanda, 46-dan alıp 54-kä qädär Ğiraq ğısyançısı yuq itelgän, 8-e äsir itep alınğan. Amerikan yağınıñ yuğaltularına kilgändä, alar bu yulı zur tügel, ülüçelär yuq, 5 xärbi törle cäräxätlär genä alğan. Soñraq Tikrit şähärendä, amerikan köçläreneñ wäkile Bill McDonald xäbärçelärgä, Samarrädä yük itelgän ğiraq suğışçılarınıñ kübese Saddamnıñ asıl ğäskäre - fidainnar kiemen kigän ide dip belderde.

Audio, Bill McDonald

Fidainnar Saddam Xösäyenneñ, anıñ xakimiate öçen canın-tänen qızğanmasqa wäğdä itkän asıl ğäskäre ide. Alarnıñ qara kiemnäre şuşı yılnıñ yazında, Ğiraqqa amerikan häm britannar bärep kergändä xalıq arasında yış kürende. Xäzer dä Ğiraqtağı Könbatış köçlärenä höcümnärne näq menä şul fidain qaldıqları yasıy dip farazlana. İkençe ber amerikan wäkile Frederik Rudesheim fikerençä, Samarrädäge höcüm ğısyançılar tarafınnan centekläp äzerlängän bulğan.

Audio, Frederik Rudesheim

"Bez monıñ äzerlängän, üzara köyläp eşlängän eş buluwına ışanabız, başqaça buluwı mömkin tügel" di amerikan wäkile. Quşma Ştatlar xärbiläre şähär aşa Ğiraqnıñ yaña ğına bastırılğan aqçasın alıp barğan bulğan. İğtibarnı, höcümçelärneñ nik menä bu oçraqta fidain kiemnären kiyüwe cälep itä. Qarşılıq kürsätüçelär şulay itep bar Ğiraq xalqına, Saddam xakimiateneñ äle tulısınşça yuqqa çıqmawın, amerikannarğa birelmäwen belderergä tırışqan digän farazlar bar. Çınnan da, Saddam çorında bar xalıqnı örketep torğan fidainnarnıñ yañadan kürenä başlawı Ğiraqta yänä qurqu ruxın arttıra ala. Läkin höcümçelär arasında ülüçelär sanınıñ şulay yuğarı buluwı, ğısyançılarnıñ şuşı ğämäle ähämiaten şaqtıy kimetä . Alar, amerikan xärbi kärwanı qüwäten tieşençä bäyälämägän bulsa kiräk. Yäğni ğäskäri operatsiälär ölkäsendä Saddam qaldıqları ildäge Könbatış köçläre belän yarışa almıy. Alarğa astırtın höcümnär yasaw yulı ğına qala. Ul yaqtan qarağanda noyäbr ayı Ğiraqtağı amerikan köçläre öçen iñ qanlısı buldı diärgä mömkin. "New York Times" basması uzğan ayda barlığı 81 amerikan xärbie hälak buldı dip yaza. Ğiraq suğışınıñ soñğı ayı sanalğan aprildä isä bu san 73 kenä ide. Waşington 1-nçe mayda Ğiraqta zur suğışnıñ betüwen iğlan itkännän birle Quşma Ştatlarnıñ anda 187 ğäskärie üterelde.

Kärim Kamal, Praga
XS
SM
MD
LG