Accessibility links

Başqortstan tatar kongrescında fetnä?


29 noyäbr könne Başqortstan Tatar kongressı Başqarma qomitetınıñ çirattan tış utırışı bulıp ütte. Anda respublik prezidentın saylawlar aldınnan BR Tatar kongressı Başqarma qomitetı sostawındağı qarşılıqlar mäsäläse tikşerelde. Bu mäsäläne tikşerügä närsä säbäpçe buldı soñ?

Uzğan atnada BR Tatar kongressı Başqarma qomitetı räise Eduard Xämitov respubliknıñ barlıq räsmi ğäzetälarında üzeneñ saylaw aldı möräcäğäten bastırıp çığardı. Anda ul Başqortstan Tatar kongressı isemennän çığış yasap, alda torğan saylawlarda tatar cämägätçelegen Mortaza Räximov öçen tawış birergä öndibez dip belderä. Barlıq ğäzetälarda beryülı, köne – säğäte belän digändäy, dönya kürgän bu möräcägät Başqarma qomitetnıñ başqa äğzaların tämam aptıraşta qaldırdı. Baqsañ, alar bu möräcägät turında işetmägän dä, belmi dä ikän. Dimäk, Eduard Xämitov Başqarma qomitetnıñ başqa äğzaların sanğa da suqmıy, keşegä dä sanamıy bulıp çığa. Şuşı xälgä näfrätlängän tatar xäräkäte liderları E. Xämitovtan aşığıç räweştä utırış cıydırdı häm üzeneñ başbaştaqlığına añlatma birüne taläp itte.

Utırış başında BR Tatar kongressı başqarma qomitetı räise üz cırın cırlıy başladı. İmeş, Mortaza Räximov bik äybät, tatarlar öçen dä küp eşlär başqara. Ämma mondıy «leksiäne» başqalar tıñlarğa telämäde. Beraz fiker alışqannan soñ, tawış birügä ike punkt quyıldı: 1)

Saylawlarda Mortaza Räximovnı yaqlarğa (Monısın E Xämitov täqdim itte). 2)

Prezident saylawlarında berkemne dä yaqlamasqa, här tatar oyışması äğzaları häm citäkçeläre, ğomumän, tatar cämägätçelege üzeneñ küñele quşqança saylarğa tieş. Başqarma qomitet utırışında 19 keşe qatnaştı. Şul äğzalarnıñ nibarı altısı ğına Eduard Xämitov täqdimen yaqladı, qalğan 13e aña qarşı çıqtı. İkençe törle itep äytkändä, Mortaza Räximovnı yaqlamasqa kiräk, dip açıq belderde. Küpçelek keşe saylawlarda berkemne dä yaqlamasqa kiräk digän qarar öçen üz tawışın birde. Şulay itep, bu cäydä genä saylanğan yaña Başqarma qomitetta qarşılıqlar başlandı. Anıñ şulay bulaçağı aldan uq bilgele ide inde. Çönki yaña Başqarma qomitet yaña köçlär, xaqimiätlär cırın cırlarğa cıyınmağan qıyu millättäşlär belän tulılanğan ide. Ä Eduard Xämitov, elekkeçä, Kongressnı xaqimiätlärneñ kesä oyışması itep qaldıru yaqlı. Çönki anıñ haman da Başqortstan pedağoğiä uniwersitetında rektor urınında qalası kilä.

Şimbä könne ütkän utırışta Başqarma qomitet äğzalarınnan iñ yalqınlı çığış yasağanı professor Ruşan Ğallämov bulğandır, möğayın. Älege utırıştan soñ bez anıñ belän milli liderlar arasında kilep tuğan qarşılıqlar turında fiker alıştıq. Ruşan äfände fikerençä, ägär Eduard Xämitov Başqarma qomitetnıñ başqa äğzaları belän kiñäşläşmiçä, nindi dä bulsa möräcägät bäyän itä ikän, anı räislektän töşerü ixtimallığı da bar. «Monıñ öçen Başqarma qomitetnıñ üzeneñ wäqälätläre dä citä», – di R. Ğallämov.

Fänis Fätxi, Ufa.
XS
SM
MD
LG