Accessibility links

дүшәмбе, 5 декабрь 2016, Казан вакыты 21:42

Yevropada İminlek häm Xezmättäşlek Oyışması utırışı räsmi belderüsez tämamlandı


Niderlandta uzğan Yevropada İminlek häm Xezmättäşlek Oyışması utırışı Rusiäneñ Gruziä häm Moldova mäs'äläsendä oyışma äğzaläre belän kileşmäwe arqasında bügen räsmi belderüsez tämamlandı. Oyışma räise, Niderland tışqı eşlär ministrı Jaap de Hoop Scheffer, Rusiäneñ qarşılıqların da istä totıp ber belderü yazaçağın äytte. Rusiä dä qanäğät bulsın dip "mäğnäsez ber dokument" qabul itüdän yaxşıraq bulaçaq, dide ul. Rusiäne bu mäs'älälärdä oyışmağa kergän başqa ber il dä yaqlamıy.

Bügen Amerikan Däwlät Sekretare Colin Powell Gruziäneñ bülenüen yaqlamasqa häm Rusiäne Moldovadan ğaskärlären çığarırğa çaqırdı. "Min Rusiä häm Gruziäne, Gruziädäge Rusiä ğaskärläre mäs'äläsen xäl itergä çaqıram, Tağın ber tapqır, Moldova häm Gruziä mäs'äläsendä İstanbulda qabul itelgän qararlarnı ütärgä öndim, şuşı möhim mäs'älälärdä urtaq fikergä kilep räsmi belderü yasap bulmağanı qızğanıç", dide Amerikan Däwlät Sekretare.

Powell şulay uq Rusiäne Moldovadan ğaskärlärne çığarırğa çaqırdı. 1999nçı yılda Rusiä Dnestr buyınnan böten ğaskärlären häm xärbi cihazların 2002nçe yılğa çığarıp beterü turında Yevropada İminlek häm Xezmättäşlek Oyışması belän kileşü tözegän ide. Kileşü ağımdağı yılnıñ dekabr axırına qadär ozaytılğan bulsa da ğaskärlär älegä qadär çığarılmağan.

Amerikan Däwlät Sekretare Colin Powell Moldova nizağın çişü öçen respublikağa xalıqara tınıçlıq ğaskärläre kertergä çaqırdı.

Powell şulay uq Gruziäneñ waqıtlıça prezident wazifaların başqaruçı Nino Burjanadze belän oçraştı. Yevropada İminlek häm Xezmättäşlek Oyışması äğzaläre qarşında çığış yasap, Powell, Gruziäneñ yaña citäkçelegenä teläktäşlek belderde. Tizdän Gruziäne prezident saylawlarına äzerlär öçen ilgä amerikan belgeçläre kitäçäk, dide Powell.

XS
SM
MD
LG