Accessibility links

Кайнар хәбәр

Saylanaçaq Başqortstan prezidentı tatar mänfäğätlären yaqlarğa tieş


Äytep ütüebezçä, BTK BKnıñ 2003nçe yıl yomğaqları turında Rusiäneñ töbäklärennän cıyılğan millättäşlärneñ oçraşıp söyläşüläre kiç belän “Piramida” mädäni-küñel açu kompleksında däwam itte.

İkençe märtäbä uzdırılğan bu cıyılışta Rusiäneñ 52 töbägennän kilgän tatarlar cıyılğan “Piramida” zalında 1300 keşe bar ide. BTK BK räise Rinat Zakirov kongressnıñ 2003nçe yılda başqarğan eşlärenä näticä yasap , problemalarğa da tuqtaldı.Anda İl'yas Möslimov, Rawil Ğäynetdin, Şamil Bikmaev, Fäyrüzä Mostafina, Tufan Miñnullin çığış yasadılar.

Çığışlardan soñ iñ aktiv millättäşlärne büläkläw buldı. Bik matur konsert kürsätelde.

“Yedinaya Rossiä” firqäseneñ räistäşe Mintimer Şäymiev üzeneñ çığışında “Soñğı yıllarda tatarlarğa qaraş üzgärde,- dide. Sabantuy bäyrämnärendä B.Yel'sinnıñ qatnaşıp, çülmäk watuları, V.Putinnıñ qatıqqa başın tığıp täñkä ezläwläre- - bezneñ xalıqnı xörmät itüdän“,- dide.

Mintimer Şäymiev üzeneñ saylaw aldınnan bulğan fikerlären Başqortstanda yäşägän tatarlarnıñ tuğan tele yazmışına da yunältte.

“Bez, Başqortstanda tatar teleneñ yazmışı niçek xäl iteläçäge turında cawap işetergä telär idek.Çönki bügen bu iñ möhim mäs'älä.

Çınlap ta , yuğarı urınğa baruçı säyäsätçe, Başqortstan prezidentı bulırğa telägän säyäsätçe, bu sorawnı cawapsız qaldırırğa tieş tügel.

Berençedän , cawapsız qaldırırğa tieş tügel, ä ikençedän tatar tele däwlät tele, yäki, üzenä başqa maxsus ber status alıp torırğa tieş. Başqaça buluı mömkin tügel.

Bu respublikada 10 meñ , yäki 15 meñ genä tatar xalqı yäşämi bit. Başqortstan Respublikasında millionnan artıq yäşägän tatar,bu sorawnı quyarğa xaqlı. Şunıñ öçen dä min uylıym, dide Mintimer Şäymiev, moña cawap tizdän yañğırar. Anı bar xalıq kötä.

Ä bezgä qalğanda, xalıqlarnıñ duslığı xaqına, xalıq kemne saylıy, şul prezident belän eşläyäçäkbez, xezmättäşlek itäçäkbez, duslaşaçaqbız”-dide ul.

BTK äğzası Udmurtiäneñ “Yañarış” gazetası möxärrire İrek Şäripov Başqortstanda yäşäwçe millättäşlärgä saylaw aldı möräcäğäte cibärergä täqdim itte. Cıyılışnıñ axırında şuşı möräcäğätneñ tekstı äzerlände häm bertawıştan qabul itelde. Xäzer sezne şuşı Möräcäğätneñ eçtälege belän tanıştırabız:

Möxtäräm millättäşlär!

Rossiä Däwlät Dumasına deputatlar häm Başqortstan prezidentın saylaw- xalqıbıznıñ kiläçäge, här tatar keşeseneñ yazmışı belän turıdan-turı bäyle.Saylawlar aldınnan bez däğwäçılarnıñ programmalarına qarap, kiläçäkkä zur ömetlär bağlıybız.

Bötendönya tatar kongressı Başqarma komitetı 2003nçe yıl yomğaqları cıyılışında bez bügenge xäl häm kiläçäk turında uylap, Başqortstanda yäşäwçe millättäşlärebezne iskä almıy buldıra almadıq. Başqortstan tatarları ğomum tatar dönyasınıñ dürttän ber öleşen täşkil itä.Sezneñ şatlıqlarığız, qayğılarığız böten tatar xalqınıñ xalätenä köçle tä'sir yasıy.

Soñğı yıllarda sezneñ tormışığızda bulğan uñay üzgäreşlärgä quanabız, ä milli tigezlek, tuğan telebezneñ xäle, mäğärifneñ üseşe ölkäsendäge qıyınlıqlar barıbıznı da borçuğa sala. Uzğan yılğı xalıq sanın alu waqıtında Başqortstan tatarları ruxi qıyınlıqlar kiçerde, san yağınnan sizelerlek yuğaltularğa duçar buldı. Bıyılğı saylawlar waqıtında Başqortstan tatarları milli mänfäğätlären istä totıp, qanunnar nigezendä üz xoquqların yaqlıy alırlar dip ışanabız. Başqortstan prezidentı itep millionnan artıq millättäşebezneñ mänfäğätlären, xalıqlar tigezlegen xörmät itkän, tatar telen respublikanıñ däwlät tele däräcäsenä yäki maxsus statusqa quyunı yaqlağan kandidat öçen tawış birü döres bulır ide. Demokratiä, xalıqlar duslığı, milli tigezlek häm tatarlarnıñ ruxi berdämlege barıbızğa da yaqtı yoldız bulıp, kiläçäk yulıbıznı kürsätsen!

Bu Möräcäğät BTK BKnıñ Rossiäneñ häm BDB illäreneñ 52 töbäge wäkilläre qatnaşlığında Qazan şähärendä qabul itelde.

Azatlıq radiosı Mälikä Basıyr Qazan.
XS
SM
MD
LG