Accessibility links

дүшәмбе, 5 декабрь 2016, Казан вакыты 07:30

İjawda «Yaqtaşlar» cämğiäteneñ çirattağı oçraşuı bulıp uzdı


İjawda yäşäwçe tatarlarnıñ küp öleşen Tatarstannıñ Ägerce töbägendä tuıp üskän millättäşlärebez täşkil itä. İjawnıñ tuğan nigezlärenä yaqın buluı da ägercelelärne Qazanğa tügel, biregä kiterä. Uqırğa teläge bulsa yuğarı uqu yortları, eşlärgä zavod-fabrikaları bar. Kiräk bulğanda tuğan-tumaçası da küp, yärdäm itä ala. Ber-berse belän oçraşıp, yärdämläşep yäşäw niäte belän ägercelelär biş yıl elek İjawda «Yaqtaşlar» cämğiäten dä buldırdı. İjaw şähäreneñ tatarlar tuplanıp yäşägän Lenin rayonı häm Ägerce rayonı xezmättäşlek kileşüe dä tözede. Ber moxittä tärbiälänep üskän keşelär bik tiz urtaq tel dä taba, tuğan telen saqlap qalu, usterü maqsatın da alğa quya, dide äñgämäbezdä cämğiätneñ räise Fäyrüzä Bağawieva.

Audio

Balalarda telgä mäxäbbät, xalqına qarata ğorurlıq tärbiäläw, mädäniäte belän tanıştıru, ğöref-ğädätlären qaytaru turında da uylanalar. Plannarında tağın ber qızıqlı punkt barlığı ütkän yäkşämbedä bulıp uzğan yaqtaşlar kiçäsendä açıqlandı. Fäyrüzä Bağawievadan qızıqsınam

Audio

Fäyrüzä Bağawievanıñ xisap çığışınnan soñ säxnä türenä mengän här keşe — bu respublika prezidentı apparatı citäkçese Aleksandr Goryainov, milli säyäsät ministrı urınbasarı Natal'ya Smirnova, Tatar ictimaği uzäge räise Fnün Mirzayanov häm başqalar «Berdäm Russiä» partiäsen, älege partiä safındağı Däwlät Dumasına kandidat bularaq täqdim itelgän Bogomol'nıynı maqtawğa bağışladı çığışın. Şulay itep «Bir qulıñnı, dustım» dip isemlängän yaqtaşlar kiçäse «Berdäm Russiä» partiäseneñ saylaw aldı kampaniäsenä äwerelde. Şulay bulmıy soñ, çönki bu kiçäne oyıştıru öçen çığımnarnı da alarnıñ üz cilkäsenä alğanı açıqlandı. Saylawlar bulmasa, şuşındıy oçraşular bulır ideme soñ digän soraw da tua. Bälki bulır da ide, çönki kiçädä säxnädän yaqtaşlarğa yärdäm itüçe berniçä sponsornıñ iseme ataldı, alarğa xättä milli säyäsät ministıyrlığınıñ räxmät xatları da tapşırıldı. İke rayonnıñ xezmättäşlegendäge «Yaqtaşlar» cämğiäteneñ rolen bilgeläp, Ägerce rayonı başlığı Färit Gabbasov bolay dide

Audio

Lenin rayonı administratsiäse citäkçese Andrey Piänzin da Ägercädän Färit Gabbasov bu oyışma xaqında mondıy fikerdä

Audio

Äye, duslıq cepläre nıqlı, mädäni bağlanışlar da özelmi. Xäzerge oçraşuğa da Ägerce rayonı uzeşçännäre bik matur konsert programması äzerläp kilgän, alarnıñ da, Çallı şähärendä yäşäp icat itüçe, uqıtuçı, kompozitor, cırçı Rinat Ğobäydullin törkeme çığışı da xalıq küñelendä cılı xislär qaldırdı.

Ä saylawlarğa kilgändä, bu zalda «Berdäm Rusiä» partiäsen yaqlawçılar ğına tügel, başqaçaraq fiker yörtüçelär bar ide. Berençedän, «Rusiäneñ xaq patriotları» partiäse: «Bez millätlär xoquqların yaqlarbız» isemle mäqäläneñ küçermäsen tarattılar, ikençedän Udmurtiä tatar ictimaği üzägeneñ xörmätle prezidentı Mäsğut Ğaratuyev mikrofon aşa üzeneñ bu partiä turında uyların belderde.

Audio

Sez Mäsğut Ğaratuyevnı tıñladığız. Ä atna başında transport tuqtalışlarında irtän eşkä aşığuçılarğa Dumağa ikençe ber kandidat Zabil'skiy — ul inde Udmurtiä Däwlät Sovetına saylandı, Bogomol'nıynı xurlap çığarğan listovkalar tarattı.

Kem kemne ciñär, cidençe dekaber kürsäter.

Xämidä Ğayfullina, Udmurtiä.

XS
SM
MD
LG