Accessibility links

шимбә, 3 декабрь 2016, Казан вакыты 03:19

Gavriil Derjavinğa häykäl açılu, Tatarstanda saylaw aldı wäzğiäte h.b.


Bügenge programmada Tatarstanda saylaw aldı wäzğiäte, M.Şäymievneñ Başqortstan tatarları häm tatar mänfäğäte turında belderüe, Gavriil Derjavinğa häykäl açılu.

Rusiä Däwlät Dumasına 3 kön qalğanda, Tatarstanda säyäsi wäzğiät tınıç diärgä mömkin. Mäxkämälärdä räncetelgän nämzätlärneñ eşläre qarala, qayberäwläre qänäğätländerelä, qayberäwläre kire qağıla. Ozaq yıllar buyı Däwlät Dumasında utıruçı eşquar Sergey Şaşurinnıñ nämzätlär isemlegennän töşep qaluı cämäğätçelek tarafınnan tınıç qabul itelde. Başqa yıllarda saylawçılarğa büläklär taratu tabiği kürenä ide. Baqsañ, ul qanunğa sıymıy ikän. Şunısı qızıq, Şaşurinnıñ büläk taratıp, saylawçılarnı satıp alu turında ğariza birüçe, yäğni anı saylaw bäygesennän çığarunı taläp itkän nämzät İrek Mortazin üze iñ tıynaqlardan bulıp çıqtı. Uram qoymalarda anıñ zuraytılğan räsemnäre kürenmi, berniçä atna elek ul M.Şäymievkä saylaw aldı yalın qaldırıp eşkä kire qaytırğa çaqırıp, belderü yasağan ide, anısı qabul itelmäde. Ä menä Şaşurin turındağı ğözere ütälde.

Çärşämbe könne Qazan universitetınıñ 200 yıllığı qısalarında tözelgän berençe obyekt – avtotexnika üzäge açıldı. Anda respublikanıñ iñ zur citäkçeläre qatnaştı.

Çärşämbe könne ğädättägeçä Azatlıq radiosınıñ Qazan byurosına törle qunaqlar kilde, telefon aşa sorawlar birelde, täqdimnär yasaldı. İñ yış qabatlanğan soraw şul – Mintimer Şäymievneñ Başqortstan tatarları turında yasağan belderüen añlatıp birüne ütenälär. Bu turıda soñraq tağı xäbärläşerbez, ä xäzer Qazan byurosı qunaqları belän jurnalist Rimzil Wäli söyläşä.

Ğädättä bez säyäsät, zur citäkçelär, cäncallar turında tıñlarğa häm söylärgä yaratabız. Ä ğadi xalıq säyäsättän çittäräk torğan kebek. Läkin meñnär häm millionnar üzlärençä yäşi, radio tıñlıy yäki tıñlamıy, aralarında millät belän qızıqsınuçılar da yış oçrıy. Qazanda yäşäwçe Ğafur abıy Wälitov çärşämbe könne bezneñ byuroğa kilep kerde. Anıñ öyendä telefonı bulmağaç, ul aldan iskärtmiçä radioçılarnı kürergä kilgän. Efirda yañğırağan isemnärneñ härqaysın xäterli.

Qazanda yäşäwçe tıñlawçıbız Ğafur Wälitov üzeneñ Başqortstan prezidentı Mortaza Räximov belän ber ük rayonnan buluın belmägän dä. Ämma ul yaqtaşınıñ milli säyäsäte belän riza tügel ikän. Läkin saylaw aldı agitatsiäse yäki kürşe respublika eşläre belän artıq mawıqmas öçen bu mäs`äläne quyırtıp tormasqa buldıq. Barı tik tıñlawçılarnıñ sorawların iskä alıp, Mintimer Şäymiev düşämbe könne yasağan belderü “Tatar-inform” taratqan xäbäre belän tanıştırabız:

Mintimer Şäymiev Başqortstan tatarları turında.

Mintimer Şäymiev fikerençä, millionnan artıq tatar yäşi torğan Başqortstan Respublikası Prezidentı wazifasına ber genä kandidat ta Başqortstanda tatar tele statusı turındağı mäs`äläne çitlätep uza almıy.

“Bu töp soraw häm bez aña cawapnı işetergä tieş”, - dide. M.Şäymiev. “Başqortstanda tatarlarnıñ sanı ruslar häm başqortlar belän ber däräcädä bulğanğa kürä alarnıñ tuğan tele däwlät tele bulırğa yäki ayırım statusqa iä bulırğa tieş. Şunnan da kimräk bula almıy”,- dip sanıy Mintimer Şäymiev. -“ Soñğı waqıtta min bigräk tä Başqortstannan şuşı mäs`älägä qarata qaraşımnı belderüne ütengän xatlar alam. Mondıy soraw tulısınça xaqlı, saylaw kampaniäläre barışında ul härwaqıt kiskenläşä häm bu şikne kiläçäkkä qaldırırğa yaramıy”,-dide Tatarstan prezidentı. «Tatar-inform» agentlığı taratqan xäbärdä menä şundıy yullar bar.

XS
SM
MD
LG