Xakimiätlär saylawlarğa äzer buluları turında xäbär itte inde. Tatarstanda barlığı 2932 saylaw komissiäse eşli, alarnıñ barısında da eş öçen şartlar tudırılğan, dip iğlan itelde xökümättä bulğan matbuğat oçraşuında. Saylawlar könne 6 meñ militsiä xezmätkäre tärtip saqlayaçaq, ayıruça möhim urınnarda da saq köçäyteläçäk ikän.
Respublikağa Rusiäneñ tışqı eşlär ministrlığınnan, Üzäk saylaw kommissiäsennän küzätüçelärneñ kilüe kötelä. Şuña östäp, saylawlarnıñ niçek ütüen küzätergä dip, här firqä diärlek üz wäkilen cibärä. Mäsälän, «Yabloko» firqäse wäkilläre beldergänçä, «alma»çılar küzätüçese inde Qazanğa kilep, saylaw urınnarın qarap yöri ikän.Evropada iminlek häm xezmättäşlek oyışması küzätüçeläreneñ kilüen xäbär itkän idek inde. Britaniädän Jordan Clive häm Qırğızstannan Baysarov Ädil xäzerge waqıtta saylaw kommissiälären qarap yöri, nämzätlär, firqälär, ictimaği oyışma wäkilläre belän oçraşa. Räsmi xäbärdä äytelgänçä, bu xalıqara küzätüçelär däwlät oyışmaları häm nämzätlär birgän transporttan qatğıy räweştä baş tarta, üzläre, taksi totıp, yörüne xup kürä. Qazanda häm respublikanıñ başqa şähärlärendä çıqqan mäğlümatlar belän küzätüçelär älegä büleşergä telämi. Saylaw aldı çorında eşlägän eş turında alar Evropada iminlek häm xezmättäşlek oyımasınıñ keşe xoquqları byurosına xisap tapşıraçaq.
Atna başınnan alıp bügengäçä, saylaw aldı bäygesennän 6 nämzät töşerelde. Mäsälän Mäskäw okrugınnan Anatoliy Perov üze ğariza yazıp, saylawlarğa qatnaşmasqa buldı. Ul «Eşmäkärlekkä yärdäm itü» firqäsennän ide. Çallı okrugında «Rus» firqäsennän Valeriy Kubasov töşep qalğan, İdel Buyı okrugında familiäsen isemlektän alu turında Ramzan Xafizov möräcäğät itkän. Şuşı uq okrugta «Uñ köçlär berlege» firqäse wäkile - Aleksandr Ştanin da saylaw aldı köräşendä qatnaşmasqa buldı. 1nçe dekaberdä mäxkämä nämzät Sergey Şaşurunnıñ terkälüen yuq itte. Ul xäzerge waqıtta, Mäskäwdä mäxkämäläşep yöri.«Xalıq partiäse»neñ isemlegennän Danilov Viniamin äfände dä töşep qaldı.
Üzäk saylaw kommissiäse xäbär itkänçä, saylawlarğa bäyle sorawlar bulsa, härkemneñ (8432)924030 telefonı belän möräcäğät itep, cawap tabu mömkinlege bar.Bikä Timerova.
