Accessibility links

дүшәмбе, 5 декабрь 2016, Казан вакыты 11:44

Düşämbedä Udmurtiäneñ milli kitapxanäsendä tatarlarğa bağışlanğan kürgäzmä açıldı


Düşämbe könne İjawda Respublikanıñ milli kitapxanäsendä tatar xalqına bağışlanğan kürgäzmä açıldı. Ul «Tatarlar — mädäni törlelekneñ etnik çığanaqları» dip atala. Kitapxanä direktorı Nailä Sobina belderüençä, respublikada yäşäwçe millätlärgä bağışlap kürgäzmälär oyıştıru ğädäti küreneşkä äwerelgän. Ağımdağı yılda ğına udmurt xalqına, besermännärgä bağışlanğan ekspozitsiälär zur uñış qazanğan. Tatarlardan soñ yähüd oyışması belän şuşındıy uq çara oyıştırırğa niätläp toralar.

Kürgäzmädä tatar xalqınıñ tarixına, könküreşenä, dini yolalarına, bäyrämnärenä bağışlanğan öleşlärendä bik küp matur itep bizälgän kitaplar urın alğan. Kürgäzmäneñ berençe kiştälärendä tatarlarnıñ kilep çığışına bağışlanğan küp kenä kitaplar quyılğan. Şulay uq ekspozitsiädä tatar teleneñ fol'klorı, grammatikası buyınça da törle yıllarda näşer itelgän uqu äsbapları, tatar ädäbiätendä zur urın totqan avtorlar äsärläre belän tanışırğa mömkin. Kitapxanädä Udmurtiädä yäşäwçe tatarlarnıñ tarixına, 90nçı yıllardağı milli üzgäreş çorın yaqtırtqan kitaplar da baytaq ikän. Alar arasında milli xäräkät citäkçese Mäsğut ağa Ğaratuyıvnıñ kitapları, respublika näşriätında dönya kürgän şağirlärneñ cıyıntıqları ayırım stendqa quyılğan. Kürgäzmä tantanalı räweştä açılğannan soñ, kitapxanäneñ kraynı öyränü bülegendä tatar zıyalıları belän oçraşu da näticäle uzdı.

Süz respublikada yäşäwçe tatarlarnıñ telen saqlap qalu, mädäniäten, sänğäten üsterüdä milli oyışmalarnıñ, mäğlumat çaralarınıñ role turında bardı. Mäğärif ministıyrlıygınnan belgeç Älfiä Ğaysina bügen mäktäplärdä tatar tele uqıtıluınıñ quyılışı, bu eştäge problemalar, alarnı çişü yulları turında söyläde, respublika Milli muzeynıñ etnografiä bülege xezmätkäre Rezeda Äxmätvalieva Udmurtiäneñ tönyağında yäşäwçe millättäşlärebezneñ telendäge uzençälekläre turında qızıqlı mäğlumatlar birde. Udmurtiä tatar ictimaği üzägeneñ maqtawlı prezidentı Mäsğut Ğaratuyıv tuğan telebezne saqlap qaluda ana telendäge kitaplarnıñ role turında äytte, häm ul kitaplarnı Qazannan millättäşebez Fänüs Ğobäydullinnıñ üz cilkäsendä alıp qaytuı, küp oçraqta arzan bäyägä, yäisä bötenläy buşqa taratuı turında söyläde, şulay uq un yıldan artıq Milli kitapxanä xezmätkärläre belän tığız elemtede eşne alıp baruların isäpkä alıp, alarğa räxmät süzlären dä citkerde.

«Yañarış» gazetasınıñ möxärrir urınbasarı Zaquan Nuretdinov mäğlümat çaralarınıñ xalıqqa informatsiä citkerüdän tış, cirle avtorlar belän icattaşlıq itüe, häm redaksiä tırışlığı näticäsendä sigez şiğerlär cıyıntığı dönya kürüen bilgeläp ütte.

«Yaqtaşlar» häm Aqsaqallar oyışmaları citäkçeläre Fäyrüzä Bahawieva, Şihabetdin Sadıyqov balalarda milli ğorurlıq tärbiäläwdä, çaralar ütkärüdä alarnıñ oyışma wäkillärenä dä tayanırğa täqdim ittelär, yärdäm itärgä ışandırdılar.

Annan soñ cirle avtorlar — İbrahim Biektawlı, Rinat Battal, Zölfät Niğmätullin üzläreneñ şiğerlären uqıdılar. Äle sanap ütkän ölkän häm urta buın wäkilläre artınnan ber dä qalışmıyça yäşlär üsep kilüe oçraşuda qatnaşuçılarnı söyenderde. «Yañarış» gazetası xezmätkäre El'mira Niğmätcan, Tatarstanda yäşlär arasında iğlan itelgän «İdelem aqçarlağı» festivaleneñ şiğriät nominatsiäsendä qatnaşıp, laureat isemen aldı. Landış Gaynetdinova, Udmurt däwlät universitetınıñ tarix fakul'tenda belem ala. Qızlar, bügenge problemalarğa bağışlap yazılğan şiğerlären uqıp, oçraşuda qatnaşuçılarnıñ iğtibarın yawladı.

Xämidä Ğayfullina, Udmurtiä.

XS
SM
MD
LG