Accessibility links

дүшәмбе, 5 декабрь 2016, Казан вакыты 11:43

Tatarstanda saylaw aldı agitatsiäse tämamlana


Menä, nihayät, dekaber ayınıñ ğına tügel, ütep baruçı yılnıñ iñ möhim waqiğalarınıñ berse – Rusiä Däwlät Dumasına saylawlar kilep citte disäñ dä bula. Comğa könne saylawlarda qatnaşuçı barlıq säyäsi firkälär, xäräkätlär häm säyäsätçelär üzläre öçen agitatsiäläwdä soñğı mömkinçelektän faydalanıp qalırğa aşıqtı. Sawlawçılarğa nämzätlär tarafınnan soñğı wäğdälär birelde. Çönki Rusiä qanunnarı buyınça şimbä könne inde saylaw aldı kampaniäsen alıp baru tıyıla. Respublikanıñ üzäk saylaw komissiäse dä üzeneñ soñğı qararların iğlan itte. Alarğa qarağanda, saylawlarda xäzer deputat bulıp torğan Flürä Zıyatdinova qatnaşmayaçaq. 4nçe dekaber könne ul üzeneñ nämzäten alu turında belderde. Bu saylawlarda eşmäkär Sergey Şaşurin da qatnaşmayaçaq. Anı saylaw isemlegennän mäxkämä qararı nigezendä töşerelep qaldı. Aleksandr Ştanin digän nämzät tä bu yulı deputat bulu öçen köräşmäyäçäk. Barısı saylaw isemleklärennän Tatarstanda 12 keşe alınğan, şularnıñ 8 – ber mandatlı okruglardan. Respublikada 2 million 800 meñ tiräse byulletennär yäkşämbe könne saylawçı tatarstanlılarnı kötäçäk. Xäyer, alarnıñ barısı da kiräk bulmas älbättä. Sovet zamanındağı kebek 99-100 protsent saylawçılarnı üz teläklären belderü ğädäte bette ul xäzer. Alay da ğädättä Tatarstanda saylawlarğa kilüçelärneñ sanı böten Rusiägä qarağanda kübräk bula ide. Bu yulı niçek bulasın bez inde düşämbe könne ük belerbez. Ä bügen äydägez yäş saylawçı fikeren tıñlap qarıyq äle. Azatlıq radiosınıñ Qazan byurosında comğa könne bulıp kitkän Albina tutaş belän qısqa ğına äñgämä tıñlağız.

Min isemem Albina, miña 20 yäş, min şäfqät tutaşı bulıp eşlim. Elek min saylawlarda berqayçan da qatnaşmasam da, kiläse yäkşämbedä uzaçaq saylawlarğa barıp, üz telägemne belderergä äzerlänäm. Säyäsät, saylawlar belän min bıyıl ğına, Qazanğa kilgäç kenä qızıqsına başladım. Ğomumän, Qazanda min üzemne bik irken xis itäm, monda kilgäç, üz öyemä qaytqan kebek buldım. Ä saylawlarda qatnaşuçı säyäsätçelärdän min alarnıñ xalıqqa yaqınraq buluların kötäm. Nämzätlär bik küp närsälär wäğdä itälär, läkin alar kiläçäktä çınğa aşsın ide. Saylanğan deputatlar byudjet tarmağında eşläwçelärgä, yäşlärgä, pensionerlarğa yärdäm qulın suzsınnar ide

Kiläçäk yäkşämbedä ütäçäk saylawlarnıñ tağın ber ähämiätle yağı şunda. Şul uq könne qayber Rusiä töbäklärendä cirle xakimiät başlıqların da saylayaçaqlar. Mäsälän, kürşelärebez, başqortstanlılar. Älege saylawlar Tatarstanda da bik zur qızıqsınu uyata. Comğa könne Qazannan ber zur bulmağan törkem Başqortstanğa yul tottı. Alar anda 7nçe dekaber könne ütäçäk saylawlarda küzätüçe bularaq qatnaşırğa niätlilär. Başqortstan prezidentın saylawlarğa bağışlanğan saytlar İnternetta da könnän-kön arta bara. Şuşı arada ğına şuşı xaqta tağın ber yaña säxifä päydä buldı. Anıñ adresı – bashobman.narod.ru.

Gölnaz İlgizär

XS
SM
MD
LG