Accessibility links

шимбә, 3 декабрь 2016, Казан вакыты 07:55

Küzätüçelär saylawlarda zur qanun bozular tapmadı


7nçe dekaberdä köndezge säğät 14.00 qädär 25% saylawçı tawış birep betergän ide inde. Ğädättägeçä, iñ zur aktivlıqnı awıl rayonnarı kürsätte. Qazanda irtänge 10 İdel buyı okrugında saylawçılarnıñ kilüe 0% bulğanda Älmättä mäsälän, 20% tiräse, ä Apas rayonında annan da kübräk bulğan. İdel buyı okrugında saylawçılarnıñ aktivlığı, başqaları belän çağıştırğanda iñ tübän buldı. İñ yuğarı aktivlıqnı Älmätlelär kürsätte, Tübän Kama okrugındağı saylawçılarnıñ yartısı köndezge 2ğä qädär eşne beterep quyğan ide. Mäskäw okrugına kergän şähär häm awıl rayonnarında da aktivlıq zur buldı. Ä menä Çallı belän Qazan şähärläre kergän okruglarda, tawış baru sülpänräk bardı. Ä ğomumän sanağanda köndezge säğät 16.00 respublika xalqınıñ yartısı tawış birep betergän ide.

Däwlät televideniese 2 säğät sayın operativ xäbärlär birep bardı, Üzäk saylaw komissiäsendä ciela torğan mäğlümatlar belän tanıştırdı. 3 meñgä yaqın saylaw urınnarında här nämzät häm firqä isemennän küzätüçe buldı. Annan tış, xalıqara oyışmalar, Rusiäneñ üzäk saylaw komissiäse, tışqı eşlär ministrlığı, Yevropada iminlek häm xezmättäşlek oyışması wäkilläre dä saylawlar barışın küzätte.

«Tawış» digän bäysez tikşerü törkeme wäkile Elena Ditätkina 14.00 yazdırıp alğan intervyuda zur qanun bozular yuqlığı turında söyläde.

Äñgämä yazılğannan soñ, 71nçe häm 64 saylaw urınnarında byulleten citmäw kebek citeşsezlek açıqlandı. Tawış birergä dip kilgän saylawçılar añlatqança, 1 säğät kötkännän soñ, byulletennär tabılğan. İdel buyı saylaw okrugında şulay uq, ber nämzät öçen tawış biregez dip, tupas räweştä basım yasarğa tırışıp qaraw terkälgän. Annan soñ, saylaw tartmasın öygä kitertü öçen ğariza yazmaw, yaña tözelgän yortlarda yäşäwçelärne isemleklärgä kertmäw kebek citeşsezleklär tabılğan.

Xalıqara demokratik institut isemennän küzätüçe sıyfatında Qazanda eşläwçe Juhani Grossmann äfände äytkänçä, ul saylawlarda tögälsezleklär kürsä dä, zur xärämläşülär, sistemalı zakon bozular terkämägän.

İnde bıyılğı saylawlarda iñ qaynar noqta bulıp sanalğan Başqortostan burında. Räsmi Başinform agentlığı mäğlumatlarına qarağanda, biredä tawış birü tınıç şartlarda bara. Aldan uq ällä nindi terrorizmnar belä qurqıtsalar da, uramnarda, uçastoklarda wazğıyät tınıç. Ämma säyäsi xäl bik qatlawlı, saylawçılar tıştan kürsätmäsä dä, qaraşları törleçä.

Başqortostanda Dumağa deputatlar häm respublika prezidentı saylana. İnternet säxifälärendä häm televidenie, radio kanallarında soñğı waqıtta bu töbäktä ayırım nämzätlärneñ xoquqların bozular häm saylaw turındağı qanunnar sanlaşmaw faktları bulğan.

Bäxäsle saylawlarnıñ iñ qızğan mäle köndez tügel, tönlä bula. Kiçke säğät 20.00 uçastoklar yabılğaç, byulletennär sanaw başlana. Xakimiätneñ administrativ resursı bu yulı niqädär xälitkeç rol' uynayaçağın aldan äytep bulmıy. Barı tik byulletennär sanalğaç qına wäzğıät açıqlanır.

Şuña kürä xäzergä Başqortostan saylawları turında tulı mäğlümat birä almıybız. Şunısı bilgele, räsmi çığanaqlarğa qarağanda, Başqortostada köndezge säğät 14.00 saylawçılarnıñ 46 % tawış birgän. Ä Tatarstanda çirle waqıt belän şul uq 14.00 säğätkä tawış birüçelärneñ sanı 48% täşkil itte. Kiçke säğät sigezgä, uçastoklar yabılğançı tawış birüçelärneñ sanın häm iñ möhime, kemnärneñ ciñüe turıda mäğlümatnı soñınnan xäbär itärbez.

Başqortostanda prezident saylaw berençe turda xäl iteläme, ällä ikençe tur da bulamı, yäki räsmi nämzät kübräk tawış cıyğan oçraqta, mäxkämä zallarında xärämläşü turında bäxäslär başlanıp kitäme – bolarnı xäzergä äytep bulmıy. Kötärgä küp qalmadı. Bezneñ tapşırulardan ayırılmağız.

Rimzil Wäli. Yunıs Ätnäle. Bikä Timerova.

XS
SM
MD
LG