Accessibility links

шимбә, 3 декабрь 2016, Казан вакыты 20:43

Udmurtiä Respublikasında Rusiä Däwlät Dumasına saylawçılarnıñ aktivlığı bıyıl tübänräk


Rusiä Däwlät Dumasına saylawlarda bıyıl Udmurtiä xalqı 1999nçı yılda bulıp ütkän saylawlar belän çağıştırğanda, aktivlıq tübänräk kürsätkän. Elekkege saylawlarda 62 protsent keşe tawış birgän bulsa, xezergesendä saylawçılar isemlegendäge keşelärneñ 58 protsentı saylawda qatnaşqan. Monı säbäben älegä säyäsätçelär añlatmadı. Şul uq waqıtta saylawçılar isemlege dä kimegän bulıp çıqtı. Respublikanıñ üzäk saylaw komissiäse belderüençä, bıyılğı saylawlar tınıç ütte, zur ğauğa kütärgän ığı-zığı oçrağı terkälmägän. Elek xalıq tawış birergä könneñ ikençe yartısında küpläp kilsä, bıyıl irtän ük saylaw uçastoklarına aşıqtı. Xättä irtänge unda uq byulleten` alu öçen dä, tawış birü bülmälärendä dä çirat barlıqqa kilgän. Saylawda qatnaşqan küzätüçelär dä, qatnaşuçılar da monı bilgeläp ütte, televizion tapşırulardan da bu xälne küzätergä mömkin ide.

Här yıldağıça, küpçelek awıl xalqı Konstitutsiädä terkälgän xoquqın başqarırğa omtılğan. Misal itep Graxovo rayonın kiterergä mömkin — anda saylawda qatnaşuçılar sanı 83 protsenttan da yuğarı.

Udmurtiä saylawçıları böten Rusiä xalqı kebek ük «Berdäm Rusiä» partiäse öçen kübräk tawış birgän — bu san 42,60 protsent täşkil itä. Tağın iğtibarğa layıq ber närsä — şähärdä yäşäwçelär älege partiä öçen kimräk tawış birsä, rayonnarda bu kürsätkeçlär yuğarıraq — İjawda bu partiäne üz itüçelär 31 protsent bulsa, Kizner rayonı xalqınıñ 65 protsentı «Berdäm Rusiä» yaqlı.

Udmurtiädä partiälärdän ikençe urında LDPR, alarnıñ tarafdarları 12 protsenttan artıq, öçençe bulıp Kompartiä — 9,7, annan soñ «Rodina» häm Rusiäneñ agrar partiäse. Monda tağın ber üzençälekkä iğtibar ittem — LDPR tarafdarları şähärlärdä kübräk, kommunistlarnı awıl eşçännäre dä, şähär xalqı da ber külämdä yaqlağan.

SPS öçen 4 protsent saylawçılar tawış birsä, «Yabloqo» tarafdarları Udmurtiädä 2 protsenttan artıq tawış cıya almağan.

7nçe dekaberdä üzäk televideniedän saylawlarğa näticä yasap, Rusiäneñ xaq patriotları partiäse öçen ber genä tawış ta bulmawın äytsälär, Udmurtiädä bu partiä öçen ber meñ ille ber keşe tawış birgän.

Dumağa ber mandatlı okruglardan respublikadan ike deputat saylanırğa tieş ide. Alarnıñ berençese elekkege Duma sostavında bulğan Svetlana Smirnova — ul üz okruğındagı saylawçılarnıñ 67 protsentınıñ küñelen qabat yawladı, ikençe okrugtan — «Udmurtneft'» aksionerlıq cämğıäteneñ general' direktorı Yevgeniy Bogomol'nıy — bu kandidat öçen saylawçılarnıñ 32 protsentı üz tawışın birgän. Barlıq kandidatlarğa qarşı tawış biruçelärneñ sanı da yuğarı — 18 protsenttan da artıq.

İğtibarğa layıq tağın ber närsä — 8nçe dekaberdä saylawlarğa näticä yasap, respublika prezidentı Aleksandr Volkov, jurnalistlar belän oçraşuda mondıy fiker citkerde. 8nçe dekaberdä respublika xakimiäte citäkçeläre, administratsiä başlıqlarınıñ kiñäşmäsendä Udmurtiä prezidentın saylawnı RF prezidentı saylawları belän ber waqıtta uzdıru turında fiker belderelgän. Volkov prezident bulıp dürt yıl elek saylanğan ide. Yaña saylawlar respublikada oktäberdä kötelä. Saylawlar qanunına üzgärtmälär kertü mäs’äläsen bu atnada respublika parlamentı tikşeräçäk.

Xämidä Ğayfullina, Udmurtiä.

XS
SM
MD
LG