Accessibility links

җомга, 9 декабрь 2016, Казан вакыты 14:46

Liberal köçlär Duma saylawlarında ciñelsä dä, prezident Putin alarnıñ äle kiräge çığaçaq dip belderä


Duma saylawlarınıñ tağın ber kötelmägän näticäse - ul da bulsa anda uñ-liberal partiälärneñ zur uñışsızlıqqa ireşüwe. "YaBLoko" häm Uñ köçlär berlege SPS qanun taläp itkän kimendä 5% yaqlaw kirtäsen uza almadı häm şuña kürä alar partiä isemleklärennän yaña Dumağa kerä almayaçaq.

Yaña Dumada xäzer şaqtıy ğına elek küplärgä tanış yözlärne kürü nasıyp bulmayaçaq, xörmätle tıñlawçılar. Häm saylaw näticäläre kürsätkänçä, şular arasında Rusiäneñ liberal dairälären wäkillek itkän, alarnıñ yöze sanalğan İrina Xakamada, Boris Nemtsov häm xätta isän kileş tere rivayätkä äylänep barğan Grigori Yavlinskilär bar. İlneñ iñ reformaçıl sanalğan ike liberal partiäse, "Yabloko" häm Uñ köçlär berlege SPS partiä isemlekläre belän Dumağa ütä almadı, çönki alarnı yaqlaw qanun taläp itkän 5 protsentnı uzmadı. Rusiäneñ Üzäk saylaw komissiäse birgän soñğı mäğlümatqa qarağanda, Yavlinski citäklägän "Yabloko"nı bar il buylap yaqlaw 4.3% qına, ä Xakamada, Nemtsov häm Çubaysnıñ Uñ köçlär berlegenä kilgändä, bu san 4 protsent tiräsendä. Şulay itep, Rusiädäge reformalarnı başlap cibärgän häm anı soñğı 10 yıl eçendä ğämälgä quyuğa turıdan-turı qatnaşı bulğan uñ köçlär yaña Dumağa kermi. Döres, alarnıñ wäkilläre äle ber mandatlı bülgelärdän saylana ala. "Yabloko"nıñ älegä şundıy 4 deputatı bulaçaq dip xäbär itelä. Alar Rostovtan Mixail Yemelyanov, Mäskäwdän Mixail Zadornov häm Galina Xovanskaya, Piterburdan Sergey Popov. Läkin bu hiç kenä dä şuşı ike liberal partiäneñ tulıqanlı parlament eşçänlege öçen citärlek tügel. Şuña kürä dä yäkşämbe saylawlarında Rusiädäge uñ, reformaçıl köçlärneñ ciñelüwe xaqında äytep bula. Bu bigräk tä yaña Dumağa urıs millätçelegen yaqlağan sul köçlärneñ, ayırım alğanda, Glazyev häm Rogozinneñ "Rodina"sı kerüwe sürätendä bigräk tä açıq kürenä. Belgeçlär fikerençä, liberal qaraşlarda torğan saylawçılar Rusiädä bolay da küp tügel, iñ qulay oçraqta da uñçılar öçen tawışlarnıñ 10-15 protsentı ğına birelä ala. Häm aları da äle ikegä - "Yabloko" häm SPS tarafdarlarına bülengän. Saylawlarda qatnaşu däräcäse tübän bulsa, andıy çaqta ğädättä näq menä liberal saylawçılar kilmi qala, uñ partiälärne yaqlaw tağın da kimi. Grigori Yavlinski üze kilep tuğan wäzğiatne bolay añlata.

Audio, Grigori Yavlinski

"Eş xaqın tülämägändä keşelär kommunistlar öçen tawış birä ide, susız kileş alar liberal-demokratlarnı saylıy, ä menä "Yabloko"-ğa tawış birü öçen sunıñ da, utnıñ da buluwı kiräk" di Grigori Yavlinski. Ä älegä aña küñelen prezident Putinneñ düşämbedä yasağan belderüwe belän genä yuatası qala.

Audio, Vladimir Putin

"Üzen ciñelgän sanawçılarğa da möräcäğät itep min alarğa şunı äyter idem - alar nigä şulay kilep çıqqannı centekläp tikşerergä tieş" di Vladimir Putin, ämma şunda uq, liberal reformaçılarnıñ Dumağa kerä almawına işarä itep, alarnıñ belem wä sälätläre äle kiräk bulaçaq dip belderä. Yaña Dumanıñ xäzer tulısınça prezident Putin qulında buluwın iskä alğanda, ildä reformalarnı däwam itü ömete dä tulısınça aña ğına bäyle bulaçaq. Dimäk, liberallarnı xakimiatkä çaqırırğamı, yuqmı, bu da fäqät Putin tarafınnan ğına xäl iteläçäk.

Kärim Kamal, Praga
XS
SM
MD
LG