Accessibility links

сишәмбе, 6 декабрь 2016, Казан вакыты 15:13

Tatarstandağı saylawlarda «Berdäm Rusiä» firqäse ciñep çıqtı


Tatarstanda da 7nçe dikäber tönendä yoqlamadılar. Saylawlar tämamlandı, ciñüçelär häm ciñgännär bilgele buldı. Üzäk saylaw kommisiäsenä töne buyı sannar kilep tordı häm ikençe könneñ berençe yartısına qädär alar üzgärep tordı. Böten Rusiädä şikelle uq Tatarstanda da «Berdäm Rusiä» firqäse berençe urında bara. Alar 59, 55% cıyğan. İkençe urında kommunistlar firqäse, bu firqägä saylawlarğa kilgän keşelärneñ 8,91% tawış birgän. Jirinovskiy firqäsen Tatarstanda da belälär, ul öçençe urında, anı 6,01% saylawçı yaqlıy. Barsına da qarşı 4,4 % tawış birelgän.

Köndezgä säğät 1gä, protokol käğäzläreneñ 99,6% isäpkä alınğan ide. Dimäk, berençel saylaw näticäläre tübändäge:



Tübän Kama saylaw okrugında, yäğni Arça, Ätnä, Baltaç, Biek taw, Zäy, Quqmara, Mamadış, Teläçe, Layış häm Çistay rayonnarında saylawlarda qatnaşqan keşelärneñ 72% «Berdäm Rusiä» firqäse öçen tawış birgän. Bu firqä kürsätkän nämzät Al’bert Salixov ta – 68,8 % ciyğan. Tübän Kama saylawçılarınıñ 7,6% kommunistlarnı yaqlıy, nämzät Robert Sadıyqovnı yaqlağan keşelär dä şul tirä - 8,8%.

Tüban Kamalılarnıñ kürşeläre – Çallı okrugında da şaqtıy qızıqlı wäzğiät kilep tudı. Ägerce, Aqtanış, Alabuğa, Mendeleyevskiy, Minzälä, Çallı häm Tuqay rayonnarında «Berdäm Rusiä» firqäse 50, 25 % cıyğan, şuşı okrugta älege firqä isemennän barğan nämzät Oleg Morozov 49,17% saylawçınıñ küñelen yawlağan. Kommunistlar firqäse öçen 11,74% tawış birelgän bulsa, KPRF wäkile Xafiz Mirğalimovnı 7% tiräse saylawçı yaqlap çıqqan. Başqa okruglardan ayırmalı bularaq, ikençe urında Çallıdağı 1 mandatlı saylawlarda «Tormış» firqäse tarafdarı Bulat Yanbarisov bara, ul 13% tawış cıya alğan. Läkin firqä isemlegendä, elekke Çallı başlığı Räfqät Altınbayıv «Tormış» firqäse öçen 5% qa yaqın saylawçı tawışların birgän.

Älmät okrugında da «Berdäm Rusiä» firqäse häm ul çığarğan nämzät ciñep çıqtı. Yäğni Aznaqay, Aqsubay, Alekseyevskiy, Älki, Älmät, Bawlı, Bögelmä, Leninogorskiy, Norlat, Spas häm Sarman rayonnarında saylawlarda qatnaşqan xalıqnıñ 69% «Berdäm Rusiä» firqäse öçen tawış birgän. Räsmi nämzät Marat Mağdeyevnı 67,54% saylawçı saylağan. Älmät okrugında da xäl başqalardan ayırılıp tora. Biredä, ayırım deputat saylawlarında ikençe urında «bötenesenä dä qarşı» digän nämzät bara. Ä «Rodina» blogın wäkilçelek itkän Fändäs Safiullin häm kommunistlar wäkile Vladimir Kazakov ikese dä 4,7% saylawçınıñ ğına küñelen yawlıy alğan.

Mäskäw okrugındağı xäl dä iğtibarnı cälep itä. Buya, Apas, Çüpräle, Yuğarı oslan, Yäşel üzän şähäre häm Qazannıñ 3 rayonında tawış birgän keşelärneñ 59% «Berdäm Rusiä» firqäsen yaqlap çıqqan. Bu firqäneñ nämzäte – Rinat Ğöbäydullin da 52,8% tawış belän köndäşlären ciñep çığa. Firqälär arasında ikençe urında 9,04% belän kommunistlar firqäse bara, ä bu firqä tarafdarı Näsimä Stolyarova 8,52% yaqın saylawçınıñ tawışın cälep itkän. Bu okrugta 12,25% saylawçı böten kandidatlarğa da qarşı tawış birgän. Üzen oppozitsiä dip iğlan itkän Rinat Möxämmädievnı 5,4% saylawçı yaqlıy ikän.

İdel buyı okrugındağı xäl dä üzençälekle. Qazannıñ Yaña Savin, Waxitov, Sovet häm İdel buyı rayonnarında qatnaşqan saylawçılarnıñ 42% - «Berdäm Rusiä» firqäsen yaqlıy. Şulay uq biredä barlıq saylawçılarnıñ 30,9% sıra şirkäte citäkçese Ayrat Xäyrullinnı yaqlap çıqtı. Ayrat Xäyrullinnıñ köndäşe - İvan Graçev 21% cıya aldı. Ä anıñ firqäse – «Eşmäkärlekne üsterü» öçen barı 4% saylawçı ğına tawış birgän bulıp çıqtı. Kommunistlar firqäse okrugta - 10% tawış cıysa, täcribäle kommunist, elekke deputat Aleksandr Saliy 7,3% saylawçınıñ küñelen yawlıy aldı. Biredä dä 12% artıq saylawçı barlıq nämzätlärgä dä qarşı tawış birde.

Ğomum alğanda, Berdäm Rusiä firqäse çığarğan nämzätlärneñ barısı da ciñep çıqtı. Firqälärneñ 3-se genä 5%-lık kirtäne ütä aldı.

Bikä Timerova.

XS
SM
MD
LG