Accessibility links

якшәмбе, 4 декабрь 2016, Казан вакыты 11:11

"Yedinaya Rossiya" Tatarstanda 60% tawış cıydı


Düşämbe, 8nçe dekaber köneneñ töp teması bulıp, Böten Rusiädäge kebek ük, Tatarstanda da älbättä inde saylawlar häm alarnıñ näticäläre tordı. Xäyer, ğomumrusiä buyınça sannarnı telägän keşe inde tönlä ük belä alsa, respublika bu saylawlarnı nindi näticälär belän qarşılaw turında berençe sannar barı tik düşämbe irtäsendä genä bilgele buldı. Alay da, “Tatarstan – Yaña ğasır” telekompaniäseneñ soñğı, tönge säğät 12däge Xäbärlär çığarılışı Tatarstanda 7nçe dekaber könne 75 protsenttan artıq saylawçılarnıñ üz teläklären beldergänen işetterde. Soñınnan bu san tögällände häm 77 protsentqa citte. Xäyer, saylawğa kilüçelärneñ sanı respublikada şaqtıy bulaçağın inde yäkşämbeneñ irtäsendä ük küz aldına kiterep bula ide. Çönki, Üzäk saylaw komissiäse mäğlümatlärenä qarağanda, inde säğät 10ğa uq, mäsälän Apas rayonında, saylawçılarnıñ 42% üz iregen beldergän ide. Başqa rayonnar da, bigräk tä awıldağılar, apaslılardan ällä ni qalışmadılar. Ä menä här saylawnıñ iñ qızıqlı mäğlümatläre – saylawlarda kemnär ciñügä ireşkän, ä kemnär saylawlar ilägen ütä almağanlığı turında bu tönne eş urınnarında ütkärgän respublikanıñ Üzäk saylaw komissiäse wäkillärennän 8nçe dekaber köneneñ berençe yartısında ğına mäğlümatlär kilä başladı. Äytergä kiräk, Tatarstanda da saylawlarnıñ näticäläre gomumrusiädägedän ällä ni ayırılıp tormıy. Şulay itep, 7nçe dekaberdä uzğan Rusiä däwlät Dumasına saylawlarnıñ liderı – “Yedinaya Rossiya”. Bu firqä saylawlarğa kilgän respublika saylawçılarınıñ 60% tawışına iä buldı. İkençe urında – kommunistlar. Alarğa 9%qa yaqın keşe tawış birgän. Öçençelekne Vladimir Jirinovskiynıñ LDPR firkäse yawladı. Liberal demokratlarğa üzläreneñ tawışın 6% saylawçı birgän. Başqa firqä häm berläşmälär Tatarstanda 5% cıya almadı. Rusiä buylap saylawlarda 4 urınğa çıqqan “Rodina” berläşmäse respublikada nibarı 3,68% tawışnı ğına cıydı. Saylawlarğa kilüçelärneñ 4,38% saylaw byulletennärendä Protiv vsex yulın saylap, bar nämzätlärgä dä qarşı tawış birde.

7nçe dekaber könne uzğan saylawlarnıñ näticäläre xaqında üz fikerlären Tatarstan prezidentı Mintimer Şäymiev tä belderde. Düşämbe könne, säğät köndezge 3tä ul jurnalistlar belän oçraştı. Oçraşuda Mintimer Şäymiev “Yabloko” häm SPS firqäläreneñ Rusiä Dumasına bu yulı elägä almawına borçılu belderde. Şulay uq ul Başqortstanda uzğan saylawlar xaqında da üzeneñ fikerlären äytte.

Şulay itep, Tatarstanda saylawlar tınıç qına ütte häm ällä ni iskitärlek näticälärsez tämamlandı. Xäzer respublika xalqın yaqın arada – kiläse yazğa qädär, saylawlar kötmi. Ä menä kürşelärebez – Başqortstan xalqı ike atnadan soñ yañadan saylaw uçastoklarına yul totaçaq. Bilgele bulğança, alar ikençe turda respublika prezidentın saylayaçaqlar.

Gölnaz İlgizär

XS
SM
MD
LG