Accessibility links

Кайнар хәбәр

"Daily Telegraph": Putinnıñ saylawlardağı uñışı Rusiägä bik qibatqa töşäçäk


Duma saylawları näticäsen Rusiäneñ üzendä genä tügel, ildän çittä dä centekläp tikşerälär, xörmätle tıñlawçılar. Yaña Däwlät Duması, anda Putin partiäseneñ küpçelekne yawlawı Rusiädäge täräqqiatneñ qaysı yünäleştä kitüwenä nindi tä''sir yasar? Britaniäneñ "Daily Telegraph" basması sişämbedä "Putinnıñ uñışı Rusiägä bik qibatqa töşäçäk" digän mäqälä bastırdı.

Rusiädäge parlament saylawları näticäse konservatizm öçen tawış birü bulıp tora dip başlıy üz mäqäläsen "Daily Telegraph". Sovetlar Berlegen cimerüne kiçerep, boyırıq iqtisadın därräw xosusilaştırunı oyıştırğan Boris Yeltsin çorınnan soñ Vladimir Putinneñ köçle, berdäm häm totrıqlı il täqdim itüwe şulay itep üz faydasın kiterä. Şuşı konservatizm eçke häm tışqı säyäsättä niçek çağılaçaq soñ digän soraw quya üzeneñ sişämbe mäqäläsendä "Daily Telegraph" häm mondıyraq cawap qaytara. İlneñ üzendä bu prezidentnıñ üzäkläşterelgän, xakimiatneñ başqa bäysez üzäkläre buluğa çıdıy almağan däwlät qoru niäten tağın da köçäytäçäk. Putin äfände citäklägän ildä Könbatıştağı George Soros kebek şäxeslär, ğomumän Könbatış añlawındağı sivil cämğiat öçen urın yuq. Prezident Rusiäneñ böyek mämläkätkä taba yulı idarä itärlek demokratiä aşa ütä dip uylıy. Bu, saylawlarda ciñü öçen däwlät mömkinleklären qullanunı, östenlek birelgän ayırım nämzätlärne däwlät tarafınnan bilängän mäğlümat çaralarında yaqlawnı añlata. Yevropada iminlek wä xezmättäşlek oyışması şuşı täcribäne, yäkşämbe tawış birü näticälären tamırdan boza ala torğan dip bäyäläde. Könbatışta Putinneñ iqtisadi reformalarğa häm Rusiäne xalıqara bazarlarğa bäyläw telägenä tuğrı buluwı uñay qabul iteläçäk, läkin üz qüwäten çit illär belän säwdä häm investitsiälär xisabına ğına arttıru andıy ilneñ bögelüçän partner buluwın añlatmıy. Bu inde Ğiraqqa kerü mäs''äläsendä kürende, ä xäzer isä, Eduard Şevardnadzene prezident urınınnan töşergännän soñ Gruziädä dä sizelä. Mäskäwneñ böyek mämläkät omtılışları Kavkaz häm Üzäk Aziädäge elekke sovet respublikalarında yaxşı çağıla. Putinneñ kiläse yılda yañadan saylanu ixtimalın arttırğan faktor bularaq yäkşämbe könge tawış birü Rusiä säyäsäteneñ elekkeçä däwam itäçägen kürsätä. Läkin andıy "däwam itü", kontrol''ne ıçqındırudan qurqıp, säyäsi liberalizmnı kire bora häm iqtisadi üseş mömkinleklären çikli. Saylawçılar, hiçyuğı alarnıñ tawış birüdä qatnaşqan öleşe, bu yulı bik saq eş itep konservatizmnı yaqladı. Läkin anıñ şul konservatizmı ilneñ eçendä dä, tışında da bik qibatqa töşäçäk dip tämamlıy Rusiä saylawları näticäsenä bağışlanğan mäqäläsen Britaniäneñ "Daily Telegraph" basması.

Kärim Kamal, Praga
XS
SM
MD
LG