Accessibility links

шимбә, 10 декабрь 2016, Казан вакыты 11:53

Tatarstannı Dumada yaña keşelär wäkillek itäçäk


Saylawlardan soñ 2 kön ütkäç, sorawlarğa cawap ezläw, näticälär turında irkenläp uylanırğa mömkinlek bar. Düşämbe könne kiç, Qazan Kremlendä, saylawlar turında belderü belän çıqqanda, Mintimer Şäymiev niçä respublika wäkileneñ Dumağa kitüe turında da fikerläre belän urtaqlaştı.

1 mandatlı saylawlarda ciñgän 5 nämzättän tış, äle firqä isemlegenä kergän 9 keşe bar. Xäzer küp kenä säyäsätçelärneñ iğtibarı şuşı isemlekkä yünältelgän. «Berdäm Rusiä» firqäseneñ Yuğarı Şura räistäşe Mintimer Şäymiev, firqä isemlegennän 4-5 keşe ütärgä tieş, dide. İsemlekkä kilgändä şunı küräbez, 1nçe urında anda Färit Möxämmätşin bara, 2nçe itep Oleg Morozovnı kürep bula. Parlament räise Tatarstannı taşlap kitärgä cıyınmıy, ä Oleg Morozov 1 mandatlı okrugta ciñde. Şuña Dumağa baraçaq 4-5 keşene isemlekneñ astağı öleşennän çamalap bula. Dimäk, bäxet yılmayğan 4-lekkä Energetika institutı rektorı Yuriy Näcmiev, Olimpiä komitetı prezidentı urınbasarı Aleksandr Kozlovskiy, firqäneñ Qazan bülege citäkçese Änwär Möxämmätzakirov, häm Çallıdan, «Kamgesenergostroy» şirkäte citäkçese Viktor Eltsov kerä. Ägär firqä Tatarstan wäkillärenä tağın 1 urın birsä, Duma Deputatı bulu bäxete Mixail Rokitskiyğa da yılmayırğa mömkin.

Evropada iminlek häm xezmättäşlek oyışması wäkilläre Tatarstandağı saylawlarnı da küzätte. Rusiädä saylawlar turındağı xisapqa mondağı faktlar da kertelergä tieş. Küzätüçelär nindi citeşsezleklär tapqandır, bezgä älegä bilgesez. Ä menä üzäk saylaw komissiäse xäbär itkänçä, Tatarstanda zur qanun bozular bulmağan. Komissiä xezmätkäre Bernard äfände Qasıymov, yalğan bulleten, yäki döres sanamaw turında tügel, ä qanun bozularnıñ başqa yağı turında söyläde. Qazandağı 50-60 pensioner saylawlarda qatnaşa almadı, alar yanında tawışığıznı biregez dip kilüçe bulmağan.

Bu ölkän yäştäge keşelär, Duma saylawlarında qatnaşa almasa da, 3 aydan alarnıñ Rusiä Prezidentı häm Tatarstan däwlät şurası saylawlarında tawış birü mömkinlege bulaçaq.

Ä menä Kommunistlar firqäse başqa törle qanun bozular turında söyli. Bu firqä wäkilläre administrativ resursnı çiksez qullanu häm keşelärne saylawlarğa barırğa mäcbür itü turında belderä. Saylawlar näticälärenä dä alar ışanmıy. Bu firqäneñ Tatarstan bülegendä äytkänçä, respublika kommunistları protokol küçermälären alıp, üzläre saylawçılarnıñ tawışların sanıy. Kompartiäneñ ştabında beldergänçä, kommunistlar 9 tügel, 13-17 % cıyarbız dip isäpläp torğan. Ä menä firqäneñ Tatarstan bülege citäkçese Aleksandr Saliyğa qayğırası yuq, 1 mandatlı okrugta ütmäsä dä, anıñ firqä isemlege belän barıber deputat bulu ixtimallığı bik zur.

Bikä Timerova

XS
SM
MD
LG