Accessibility links

якшәмбе, 4 декабрь 2016, Казан вакыты 09:20

Tatarstanda rus tele buyınça tikşerenülär bulırmı?


Respublikada tormış tik tormıy, här könne diärlek şaqtıy ğına qızıqlı, ähämiätle waqiğalar bulıp tora. Läkin soñğı arada alarğa iğtibar äzäyde, çönki bu könnärdä berençe tema bulıp qayda da 7nçe dekaber könne ütkän saylawlar, alarnıñ näticäläre tordı. Şuña kürä xäzer sezneñ iğtibarğa qısqa ğına soñğı könnärneñ iñ qızıqlı xäbärlären täqdim itäbez. Sişämbe könne Tatarstan Däwlät Şurasınıñ räise Färit Möxämmätşin Mäskäwdä buldı. Anda ul Rusiä qanunçılarınıñ cıyılışında qatnaştı. Älege utırış Rusiä Konstitutsiäsen qabul itügä 10 yıl tulu uñayınnan ütte. Anda prezident Vladimir Putin dä qatnaştı. Törle ölkälärdän kilgän qanunçılar Rusiä Däwlät Dumasınıñ Federatsiä Şurası häm töbäklärdäge qanun çığaru organnarı belän xezmättäşlege turında söyläşte.

9nçı dekaber könne Säwdä häm tışqı iqtisadi bağlanışlar ministrlığında respublikadağı kommersiä oyışmalarına çit il investitsiälären cälep itü mäs’älälären tikşerügä bağışlanğan tügäräk östäl uzdı. Anıñ eşendä qatnaşqan ministr Xafiz Salixov süzlärenä qarağanda, ağımdağı yılda respublika iqtisatına 1 milliard 48 million dollar külämendä investitsiälär cälep itelgän. Bu kürsätkeç buyınça Rusiä töbäkläre arasında Tatarstan 8nçe urında tora ikän. Çärşämbedä Qazanda respublikanıñ Ministrlar kabinetında keçe eşmäkärlekne urınnarda näticäle tikşerü mäs’äläsenä bağışlanğan kiñäşmä uzdı. Bu xaqta söyläşüne şulay uq respublikanıñ başqa şähär häm rayonnardağı eşmäkärlekne yaqlaw üzäklärendä dä däwam itäçäklär. Qazan milli-mädäni üzägendä isä sälämätlek saqlaw tarmağında berdäm mäğlümat sistemasın buldıru xaqında söyläştelär.

Tatarstan Däwlät Şurasınıñ Fän, mäğärif, mädäniät häm milli mäs’älälär buyınça daimi komissiäseneñ utırışı uzdı. Anda yänä respublika xalıqları telläre turındağı qanun tikşerelde. Bu yulı qanunnı tikşerüdä Qazannıñ rus cämğiäte wäkille dä qatnaştı. Alar rus teleneñ yazmışı belän tirän borçıluların belderep, Tatarstanda da bu telne saqlarğa, yaqlarğa häm üsterergä kiräklegen belderdelär. Ul ğına da tügel, Tatarstanda rus tele buyınça tikşerenülär dä ütkärergä kiräk ikän äle. Alar fikerençä, Tellärne üsterü buyınça däwlät programmasında da rus tele ikençe däwlät tele bularaq qına qarala ikän. Moña cawap itep deputat Tufan Miñnullin, Tatarstan tatar telen öyränüçe berdän-ber töbäk bulğanğa, älege programma tatar belän rus tellären tigezli almawın iskärtte. Xäyer, bu ike tellär üzläreneñ xoquqları buyınça tigezlänsä, kem kübräk otar ikän äle. Tellär turındağı qanun häm däwlät programması kiläse sessiädä ikençe uqılışta qaralırğa tieş.

XS
SM
MD
LG