Belgänegezçä, ğinwar ayınıñ başında tatar estradasında şaqtıy qızıqlı ber çara uza. Ul “Tatar cırı” dip atala häm uzğan yılnıñ iñ populyar cırlar bäygesenä näticä bularaq oyıştırıla. Tıñlawçılar tarafınnan uzğan yılda icat itelgän cırlarnıñ iñ populyarları bilgelänä, älege cırlarnıñ avtorları häm başqaruçıları büläklänä. Mondıy çara 2004nçe yılnıñ ğinwarında da ütkäreläçäk. Şuşı xaqta çärşämbe könne Qazannıñ Säwdä-sänäğät palatasında uzğan matbuğat oçraşuında äytelde. Oçraşuda oyıştıru komitetı häm “Yaña ğasır” telekompaniäse citäkçese İlşat Äminev, anıñ urınbasarları – “Tatarstan” kanalı citäkçese Ayrat Sibğätullin, “Bars-media” kompaniäse direktorı Marat Gäräev qatnaştılar. Alar süzlärenä qarağanda, konsertlar bu yulı da, bıltırğıça, Piramida küñel açu üzägendä uzaçaq häm 3 kön däwam itäçäk. Läkin başqa yıllardan ayırmalı bularaq, bar kiçälärdä dä şul ber ük cırçılar qatnaşaçaq. Berençe könne alar yaña cırlar başqaraçaq, ikençe konsert ciñü yawlağan cırlardan toraçaq. Ä öçençe könne tamaşanıñ iñ qızıqlısı bulaçaq. Bu könne çäy öställäre artında tamaşaçılar layıq dip tabılğan cırlarğa häm alarnı başqaruçılarğa büläklär tapşırğannı ğına qarap utırmıyça, alar belän bergä bäyräm itäçäklär. Büläklärgä kilgändä, ciñüçelärgä büläk itep birelä torğan Altın bars sını bıyıl üzgärtelep eşlängän. Şunısın da äytergä kiräk, “Tatar cırı-2003” festivale bu yulı Xalıqara bulaçaq. Oyıştıruçılar süzlärençä, anda Avstraliädän Zölfiä Kamalova qatnaşaçaq. Şulay uq Finländiädän dä ber cırçı yeget qatnaşır dip kötelä ikän. Tağın ber yañalıq. Älege bäygedä ciñep, Altın bars premiäsenä layıq bulğan cırlar “Bars-media” firması tarafınnan audiokasseta häm kompakt-diskta ğına tügel, DVD-diskta da dönya küräçäk.
Gölnaz İlgizär
