Accessibility links

"Rodina" berläşmäseneñ uñışı Rusiädä böyekmämläkätçel köçlärneñ artuwın kürsätä


Rusiädäge Duma saylawlarınıñ aldan bik ük kötelmägän näticälärennän berse - anda "Rodina" berläşmäseneñ şaqtıy kiñ yaqlaw qazanuwı. 4 ay elek kenä oyıştırılğan şuşı säyäsi köçneñ Dumada xäzer 37 deputatı bulaçaq. "Rodina"nıñ kommunistlar yaqlawın kimetü maqsatında Kreml tarafınnan tözelüwe xaqında süzlär yörsä dä, anıñ sulçı wä millätçel ritorikası artında ni yata, kiläçäktä şuşı berläşmä nindi yuldan kitär, monı farazlawı ciñel tügel.

"Rusiäne kire üzebezgä qaytarıyq!" - Däwlät Duması saylawlarına äzerlekne "Rodina" menä şundıy öndämä belän alıp bardı, xörmätle tıñlawçılar. Häm monı Rusiä saylawçılarınıñ şaqtıy ğına öleşe yaqlıy bulıp çıqtı, tözelüwenä 4 ay da tulmağan, yäğni ğämäli eşläre belän üzen cünläp tanıtırğa da ölgermägän yaña berläşmägä 5 yarım million saylawçı üz tawışın birde. Däwlät Dumasında anıñ 37 deputatı bulaçaq. Beryaqtan qarağanda, bu ällä ni küp tügel, läkin parlamentta möhim mäs''älälär, äytik, konstitutsion üzgäreşlär tikşerelgän oçraqta "Rodina" deputatları xälitkeç rol'' uynıy ala. Şul säbäple xäzer oyışmanıñ nindi säyäsi programma nigezendä eş itüwe, kiläçäktä nindi qaraşlarnı çağıldıraçağı zur qızıqsınu uyata. Saylawlarğa äzerlekne "Rodina" mäğlüm iqtisadçı, elek kompartiä tarafdarı bulıp yörgän Sergey Glazyev häm Dumanıñ xalıqara mönäsäbätlär komitetı räise Dmitri Rogozin citäkçelegendä alıp bardı. Şularnıñ berençese kiñ cämäğätçelekkä sulçı qaraşları, däwlätneñ iqtisadqa tıqşınuwın arttırunı yaqlawçı bularaq tanış, ä ikençese üzeneñ millätçel qaraşları belän tanılğan keşe. Şuña kürä dä, "Rodina" Dumada xäzer natsional-sotsialistik, yäğni urıs faşizmına xas qaraşlarnı alğa sörüçe säyäsi köç bula ala digän qurqular işetelä. Bigräk tä "Yabloko" häm SPS kebek uñ liberal köçlärneñ Dumağa ütä almawı sürätendä. Liberallarnıñ tänqiten isä Dmitri Rogozin "pıçraq" dip atıy häm andıy qurqıtular, saylawlarda ottırğan uñ köçlärneñ buldıqsızlığın ğına kürsätä dip belderä.

Audio, Dmitri Rogozin

Üzen xäzerge xakimiatkä oppozitiädä toruçı köç dip iğlan itkän "Rodina" aldağı 4 yılda ni eşlärgä cıyına soñ? Sergey Glazyev älegä saylawlar aldınnan bäyän itelgän programmağa tuğrı bulıp qalaçağın äytä.

Audio, Sergey Glazyev

"Yaña Dumada eşläwe ciñel bulmayaçaq, älbättä, çönki qüwät balansı xakimiat partiäse yağına awışqan. Häm bez ügetläw yulı belän, üzebez täqdim itkän qanun ölgeläreneñ däwlät mänfäğätlärenä turı kilüwen isbatlaw aşa eş itäçäkbez. Kem inde tabiğät baylıqlarınnan kilgän çamadan tış tabışnı ğadel itep bülügä qarşı çığa ala? Şul baylıqlarğa xuca sanalğan däwlätneñ anda üz öleşe bulırğa tieş. Kem eş xaqların arttıru yulların kamilläşterügä qarşı bula ala?" digän soraw quya Sergey Glazyev, Dumadağı küpçelekneñ kiläçäktä "Rodina" täqdimnären yaqlawına ömetlänep. Berläşmäneñ säyäsi qaraşlarına kilgändä, alar Rusiädä kiñ cäyelgän böyekmämläkätçel xislärgä nigezläner dip farazlana. Rogozinneñ, misal öçen, Tatarstan tösle Rusiä eçendäge milli däwlätlärgä mönäsäbäte şaqtıy tiskäre, elekke sovet respublikaları, ä xäzer bäysez däwlätlär Ukraina, Gruziä kebek illärgä qarata da ul qırıs belderülär yasap tora. Saylawçılarnıñ "Rodina"ğa tawış birep näq menä şundıy böyekmämläkätçel qaraşlarnı yaqlawı Rusiäneñ demokratik dairälärendä, şul isäptän tatar wä başqort milli xäräkätendä dä zur borçu uyatırlıq närsä.

Kärim Kamal, Praga
XS
SM
MD
LG