Parlamentnıñ daimi kommisiäse konstitutsiägä üzgäreşlär kertergä täqdim itä.

Pänceşämbe könne Däwlät Şurasınıñ däwlät tözeleşe, cirle üzidarä häm tışqı elemtälär kommisiäse Tatarstan xalıq deputatların saylaw könen bilgeläw turında qarar qabul itte häm anı parlamentnıñ kön tärtibenä kertergä täqdim itte. Komissiä utırışında, tögäl saylaw köne äytelmäsä dä, monda ber nindi yañalıq yuq. Aldan farazlanğança, Tatarstan Däwlät Şurası Rusiä Prezidentı saylawları belän bergä 2004 yılnıñ 14nçe martında ütäçäk.

Rusiä Dumasınıñ elekke çaqırılış deputatları soñğı utırışın ütkärgän bulsa, Tatarstan parlamentı wäkilläreneñ berniçä ay waqıtı bar. Ä älegä deputatlar kiläse parlamentnıñ eşe qanunı häm eşlekle bulsın, dip şartlar äzerläp quya. Bu yılnıñ 22 sentäberendä Däwlät Şurası «Tatarstan deputatların saylaw turında»ğı qanunğa tözätmälär kertte.

Tatarstannıñ konstitutsiäse dä soñğı yıllarda berniçä tapqır üzgärtelde. Ämma bu tözätülär dä soñğı tügel ikän. Däwlät tözeleşe kommisiäsendä deputat statusı, komitetlar häm munitsipal saylawlar turındağı mäs’älälär qaraldı. Status turında äytelsä dä, asılda süz xalıq deputatı urınına, Däwlät Şurası deputatı, dip yañaça ataw turında bara. Komitet digäne dä, daimi kommisiälärne komitet dip isemen alıştıruğa qaytıp qala. Häm öçençe tözätmä cirle üzidarä oyışmalarına saylawlar ütkärü tärtibenä qağıla ide.

Konstitutsiä tiräsendä dä şul uq xäl. Komissiä räise Vasiliy Loginov äytkänçä, Tatarstan parlamentı respublika konstitutsiäsen Rusiänekenä tulısınça täñgälläştereläçäk. Ämma 3 mäs’älädä deputatlar üs süzlärendä torırğa ciena.

Berse däwlät telläre turındağı matdä, ikençese – grajdanlıq häm öçençese - suverenitet mäs’äläse. Qalğan başqa mäsällärdä, ( deputat statusı, parlament tözeleşe h.b.) konstitutsiägä üzgäreşlär kertelgändä deputatlar tarafınnan qarşılıq bulmas, dip farazlap bula. Här xäldä komissiä utırışında şulay buldı.

Tatarstan konstitutsiäsen Rusiäneke belän täñgälläşterü eşe, 15 dekaber sessiäse belän genä tämamlanmıy. Rusiä Konstitutsiä mäxkämäse Tatarstan suverenitetın, tellär statusı häm başqa möhim mäs’älälärneñ töp qanunğa turı kilü-kilmäwe turında qararın çığarmıyça, Tatarstan deputatları üzgäreşlärne kertmi toraçaq.

Bikä Timerova.