Accessibility links

Кайнар хәбәр

Yekaterinburg möselmannarın ni borçıy?


Küptän tügel Sverdlov ölkäse möselmannarınıñ Qazıylat idäräse yıllıq näticälärgä bağışlanğan zur mäcles ütkärde. Mäclestä törle mäxällälärdän kilgän imamnar, möğallimnär, din ähelläre, jurnalistlar, mäğärif ministrlığı xezmätkärläre qatnaştı. Şulay uq Mäskäwdän şäyex Näfiğulla xäzrät Aşirov ta kilgän ide.

Mäclestä möselmannarnı borçığan bik küp problemalar kütärelde. Şularnıñ berse – nadanlıq. Bügenge köndä din-islam asılların öyränü kiräk bulğança kiñ masştabta alıp barılmıy. Mäçetlärgä xalıq comğa könnärdä häm bäyrämnärdä genä küp yöri. Här mäçet dini mäğärif üzägenä äwerelergä tieş. Din däreslären alıp baruda cirle mäğärif ministrlıqları belän tığız elemtädä eşläw bik möhim.

Möselmannarnı borçığan mäs'älälär arasında tağın ber bik möhime – möselman jurnalistikasınıñ bügenge xäle, anı üsterü yulları buldı. Çınlap ta, islam dinenä, möselmannarğa bulğan qaraş küp oçraqta massaküläm mäğlumat çaraları arqılı formalaşa. Qızğanıç, bügenge köndä möselman jurnalistikasında üz eşläreneñ çın ostaları bik az eşli, hönärmänlek citeşmi. Siräk çığarıla torğan möselman gazetalarınıñ kübese uqu öçen iğtibarnı cälep itärlek qızıqlı tügel, tele-radiotapşırular bik az. Bulğannarı da iqtisadi nigez bulmağanlıqtan betä bara. Äytik, Sverdlov ölkäsendä tatarlarnıñ ölkä milli-mädäni moxtäriäte tarafınnan ayğa ike tapqır çığarıla torğan, rus telendäge “Bügenge islam” tapşıruı, finans çığanağı belän tä'min itüçelärneñ bütän bulışırğa telämägänlege arqasında yuqqa çığıp bara. Televizion tapşırularnı yasaw häm efirğa çığaru, bilgele inde, bik küp çığımnar taläp itä torğan äyber. Tatar telendäge tapşırularnı saqlap qalu, dini tapşırularnı çığarudan tuqtatmaw kebek bik cawaplı yökne teläp üz cilkälärenä aluçı biznesmennar az. Mäclestä qatnaşuçılar, xökümät yağınnan yärdäm itülären sorap ölkä gubernatorı isemenä xat yazarğa, häm şulay uq tatar eşmäkärlärenä möräcäğät itärgä qarar qıldılar.

Fäwiä Safiullina. Yekaterinburg.

XS
SM
MD
LG