Accessibility links

Кайнар хәбәр

Başqortostan Prezidentı saylawlarnıñ awazı Qazanğa barıp citä


Kürşe Başqortostanda barğan prezident saylawlarınıñ qaytawazı Tatarstanğa da kilep citä, xörmätle tıñlawçılar. Böten Rusiä külämendä yañğırağan saylaw kompaniäse waqiğaları tatarstanlılarnıñ iğtibarın ayıruça cälep itä, çönki alar öçen Başqortostan kürşe respublika genä tügel, ä qardäşlärebez yäşägän yaq bulıp tora.

Studiäbezneñ bügenge qunağı, Qazanda yäşäwçe Vladislav Kuz'min da, küptän tügel genä Başqortostan prezidentın saylawlar arqasında şul respublikanıñ Yañawıl rayonına barıp qaytqan. Anda ul prezidentlıqqa nämzätlärneñ berse, Rälif Safin isemennän, 7nçe dikäber saylawları barışınıñ küzätüçese bulıp torğan. Vladislav äfände süzlärençä, Başqortostanğa säfär bik ciñel bulmağan, çönki andağı Däwlät Avtoinspeksiäse wäkilläre Tatarstannan häm başqa kürşe ölkälärdän kilgän küzätüçelärneñ avtobusların respublika çigendä tuqtatıp, törle säbäplär belän kertmi torğan. Şuña kürä dä, studiäbezneñ qunağı utırğan avtobus 7nçe dikäber tönendä Qazan-Ufa yulı belän tügel, ä başqa “taptalmağan, ğayre räsmi” yullar belän genä Başqortostanğa kerä alğan. Vladislav äfände süzlärenä qarağanda, qayber Başqortostan çigen ütä almağan, tuqtalıp qalğan avtobuslarnıñ şul uq 7 dikäber tönendä bilgesez şäxeslär tarafınnan tägärmäçläre tişelgän, ä Sergey Veremeyenko isemennän kilgän küzätüçelärneñ avtobusına taşlar ırğıtılıp, berniçä keşe xätta cärähätlär dä alğan.

Qazannan kilgän küzätüçelärneñ avtobusı Yañawıl rayon üzägenä barıp citkäç kenä, anı cirle avtoinspeksiä patrule tuqtatqan. Böten käğäzläre dä tärtiptä bulğaç, Tatarstan avtobusın yul inspektorları cibärergä mäcbür bulğannar. Ämma, cibärer aldınnan avtobusta utırğan keşelärneñ isemnären maxsus isemlekkä kertkännär. Bu bik säyer, çönki bilgele bulğança, Yañawıl rayonında nindider serle xärbi obyekt yuq, ul suğış barğan qaynar noqta da tügel. Ğomumän alğanda, militsiä qullanğan andıy çaralar Rusiä Konstitutsiäsendä, başqa xalıq ara keşe xoquqlarına bağışlanğan dokumentlarda iğlan itelgän şäxeslärneñ xäräkät iregenä qarşı kilä. Qazan qunaqları barısı da Lukoyl kompaniäseneñ xoquq belgeçläre, dimäk üz xoquqların yaxşı belüçelär. Cirle xakimiätneñ başqa qanunsız çaralarınnan alarnı bälki şuşı fakt ta qotqarğandır.

Äñgämädäşebez süzlärençä, saylaw könendä ul küzätkän Çıtırman awılı uçastogında ällä ni zur qanun bozular kürenmägän, barı tik ber genä oçraqta kolxoz räisen uçastoktan çığarırğa turı kilgän, çönki ul kemneñ qaysı nämzätkä tawış birgäne turında qızıqsınu beldergän. Ä prezident saylawları köne aldınnan şul uq räis böten awıl yortları buylap yörep çığıp, xäzerge prezident Mortaza Räximov isemle nämzätkä tawış birergä öndäp yörgän.

Ä inde Räximovqa qarşı çıqqan nämzätlär öçen tawış birergä çaqırğan şul uq awıl keşeläre, agitatorlarğa ayıruça awır bulğan. Çönki alarnıñ kolxozdan alınğan eş xaqları, boday, aşlamaları şul uq kolxoz citäkçese aşa ütä. Räis alarğa tieşle aqçanı yäisä şikärne, onnı, başqa äyberlärne teläsä birä, ä telämäsä — birmi. Şulay bulğaç, agitatornıñ üzeneñ, anıñ ğäiläseneñ tormışı räis qulında.

Saylawlarğa kilgän Qazan küzätüçelärdän cirle saylaw komissiäse äğzaları bulğan qanun bozularğa iğtibar itmäwlären dä sorap qarağannar. Sez monda ber köngä genä kilgän keşelär, ä bezneñ öçen bu tawışlar bik möhim, dip dälillägännär alar üzläreneñ möräcäğätlären.

Menä şundıy köçle administrativ basımnı qullanıp ta, saylawlarnıñ berençe turında ciñep çıqmağan Räximovnıñ respublika xalqı arasında abruyı tübän buluı kürenä. Ä alay bulğaç, ikençe turda alar ğädel bulmağan ısullarnı qullanıp, saylawlar näticäsen üzläreneñ faydasına yasıy alırlarmı, yuqmı — monısı inde xäzer här Başqortostan keşeseneñ üzennän tora. Vladislav Kuz'min saylawlarnıñ ikençe turğa küzätüçe bulıp Başqortostanğa baruı da bilgesez. Çönki Vladislav Kuz'min eşlägän Lukoyl kompaniäsenä tayanğan Rälif Safin ikençe turda qatnaşmıy. Härxäldä anıñ mäxkämägä birgän däğväläre älegä känäğätländerelmägän.

Azatlıq Radiosı öçen, Qazannan İskänder Nurmi

XS
SM
MD
LG