Tatarstanda da 12nçe dekaber könne Rusiä Konstitutsiäse könen bäyräm ittelär. Xäyer, älege bäyräm Rusiäneñ töp qanunın qabul itügä 10 yıl tuluğa bağışlansa da, bu uñaydan Qazanda ğına tügel, xätta Mäskäwdä dä ällä ni zur bäyräm çaraları uzmadı. Respublikada isä Konstitutsiä köne ğomumän çirattağı yal köne räweşendä genä ütte. Däwlät Şurası räise Färit Möxämmätşinnıñ häm tatarstan buyınça baş federal’ inspektor Marsel Ğälimardanovnıñ respublika xalqına möräcäğät itkän qotlawların isäpkä almağanda. Tatarstan prezidentı Mintimer Şäymiev bu yulı räsmi qotlawlar belän çıqmadı. Läkin ul Rusiä Konstitutsiäse köne uñayınnan İnterfaks agentlığına äñgämä birde. 10 yıl elek qabul itelgän ilneñ töp qanunınıñ iñ yaxşı sıyfatı bulıp, anıñ qanunğa häm keşe xoquqların yaqlawğa nigezlänüe dip belderde anda prezident. Anıñ fikerençä, bu dokument waqıt belän sınaldı häm ul äle üzen Mintimer Şäymiev, Vladimir Putinnıñ fikeren xuplap, Konstitutsiäne üzgärtergä kiräkmägänen iskärtte. Şulay uq İnterfaks agentlığına birgän äñgämäsendä Şäymiev töbäklärneñ qanunnarın federal’ qanunnar belän täñgälläşterü temasın da äylänep ütmäde. Älbättä, berdäm xoquqı qır bulırğa tieş, läkin şul uq waqıtta üzäk qabul itkän qanunnarnıñ Rusiä Konstitutsiäsenä qarşı kilüe bulmasın ide, dide ul. Häm misal itep Tatarstan prezidentı tatarlarğa latin imlasın kertergä tıyğan Rusiä Däwlät Dumasınıñ qararın kiterde.
Xäyer, bu könnärdä latin imlasın torğızu mäs’äläse Şäymiev tarafınnan ğına tikşerelmäde. Soñğı arada saylawlar, qanunnarnı täñgälläşterü problemaları artında qalğan latin teması yañadan aktualläşä kebek. Belgänegezçä, küptän tügel genä respublika Däwlät Şurasınıñ Fän, mäğärif, mädäniät häm milli mäs’älälär komissiäse Tatarstannıñ Konstitutsion mäxkämäsenä möräcäğät itkän ide. Älege möräcäğät näq menä şul tatar teleneñ latin imlasın qaytaruğa qağılışlı ide. Süz uñayınnan şunı da äytep kitik. Şuşı köngä qädär Konstitutsion mäxkämä deputatlarğa üzeneñ cawabın citkermäde. Xäyer, mäxkämäneñ monıñ öçen äle 24nçe dekäbergä qädär waqıtı bar.
Gölnaz İlgizär
