Qabul. Äfğan xakimiate ilneñ yuğarı mäclese Loya Cirğanı açu könen tağın ber köngä, irtägädän yäkşämbegä qädär küçekterergä buldı. Asılda mäcles üz eşen äle çärşämbedä ük başlarğa tieş ide, läkin bu, anda qatnaşaçaq bar wäkillärneñ dä Qabulğa kilep citä almawı säbäple başta şimbägä küçerelde. Konstitutsiä komissiäseneñ särkätibe Färüq Wardaq äytüwençä, mäcles eşen başlawnı yäkşämbegä küçerü, prezident Xämit Qarzai bilgelägän wäkillärneñ qayberäwläre äle haman da başqalağa kilep ölgermäwe belän añlatıla. Loya Cirğa Äfğanstannıñ yaña Konstitutsiäsen qabul itärgä tieş. Ğöläm Bahautdin, Hirattan kilgän wäkil, çittän yasalğan yanawlarğa qaramastan Loya Cirğanıñ konstitutsiäne qabul itäçägenä ışanuwın belderde. "Äfğanstannıñ çittäge doşmannarı ildä tınıçlıq urnaşuwın telämi, alar çualışlar wä totrıqsızlıq çığunı yaqlıy. Allanıñ räxmäte belän Loya Cirğa tınıç qına ütär häm Konstitutsiä qabul iteler" dip belderä Ğöläm Bahautdin.
