Accessibility links

якшәмбе, 4 декабрь 2016, Казан вакыты 15:22

Ğiraqta ilneñ elekke citäkçese Säddäm Hösäin qulğa alındı


Ğiraqtağı töp amerikan citäkçese Paul Bremer, bügen elekke Ğiraq diktatorı qulğa alındı häm xözer ul amerikannar citäkçelegendäge koalitsiä törmäsendä , dip belderde.

Paul Bremer, Ğiraqtağı amerikan ğaskärläre citäkçese general leytenant Ricardo Sançes belän berlektä matbuğat oçraşuında qatnaşqan Ğiraq İdarä Şurası äğzase Adnan Paçaçi, Ğiraq xalqın qotladı: "İdarä Şurası isemennän Ğiraq xalqın şuşı tarixi kön belän qotlarğa telim. Qurqu, yäşren xezmätlär häm basım xökem sörgän däwlät bette häm ber qayçan da kire qaytmıyaçaq. Ğiraqlılarnıñ küñelläre tulı bäxet häm şatlıq!" dide Ğiraq İdarä Şurası äğzase.

Säddäm üzeneñ tuğan şähäre Tikrittan 15 çaqrım yıraqlıqta ber fermada bazda tabılğan. Qulğa alğanda köç qullanu bulmağan. Bremer süzlärençä, bügen – Ğiraq tarixınıñ oluğ köne. Amerikan xärbiläreneñ Ğiraqtağı citäkçese Ricardo Sançes jurnalistlarğa yançığan, saqal-mıyığı üskän Säddämneñ video tasmasın kürsätte.

Ğiraqnıñ İdarä Şurası başlığı Abdul Aziz äl-Häkim, Säddäm Hösiänneñ qulğa alınuı – Ğiraq xalqı öçen genä tügel, ä böten keşe öçen möhim, çänki Säddäm xakimiättä çaqta keşeçelekkä qarşı cinäyätlär qıldı, dip belderde. "Bu kön – Ğiraq xalqına ğına tügel, böten keşelek dönyası öçen möhim. Tınıçlıq yaratuçılar öçen bu oluğ kön, çönki Säddäm keşeçelekkä qarşı cinäyätlär qıldı" dip belderde Äl-Hakim.

1990nçı yılda Ğiraqnıñ basıp kerüen kiçergän Kuwaitnıñ mäğlümat ministrı Möhammäd Abdulhassan, Frans Press mäğlümat agentlığına, "böten dönya bu zalimneñ qulğa alınuın kötte" dip belderde. İran, Ğaräb Ligası häm Yordaniä şulay uq, Säddämneñ qulğa alınuı – Ğiraqnıñ üseşe öçen bik möhim adım , dip belderde.

Dönya citäkçeläre, elekke Ğiraq diktatorı Säddäm Hösiäinneñ qulğa alınuı turındağı xäbärne xuplap çıqtı. Britaniä premyer-ministrı Tony Blair, Säddämneñ qulğa alınuı – anıñ kire xakimiätkä qaytu ixtimalın yuqqa çığara, dip belderde. "Säddäm xakimiättän kitte. Ul kire qaytmayaçaq. Monı xäzer Ğiraq xalqı belä. Häm näq alar Säddämneñ yazmışın xäl itäçäk" dide Blair.

Ğiraq suğışın yaqlamağan Germaniä kanslerı Gerhard Schroeder Amerikan prezidentı George Bushnı uñışlı xärbi opratsiä belän qotladı, Säddäm Hösäinneñ qulğa alınuı Ğiraqta totrıqlılıq urnaştıru eşenä yardäm itäçäk, dip belderde.

Fransiä prezidentı Jacque Chiracnıñ matbuğat wäkile Catherine Colonna, Prezident, Säddäm Hösäinneñ qulğa aluınnan bulğan şatlıqnı urtaqlaşa" dip xäbär itte. Şulay uq Ğiraq suğışına qarşı bulğan Chirac – bu adım ğiraqlılarğa üz yazmışın häm bäysez Ğiraq yazmışın üz qullarına alırğa yardäm itäçäk, dip belderde.

İspaniä tışqı eşlär ministrı Ana Palacio – elekke citäkçeläreneñ qulğa aluın Ğiraq xalqı öçen azatlıq köne, dip bilgeläde. Xäzer inde, anıñ süzlärençä, "qanlı diktatornıñ qotıçqıç külägäse dä yuqqa çığaçaq, tormış caylanaçaq". Şulay uq Avstraliä häm Belgiä premyer-ministrları da Säddämneñ tabıluı häm qulğa alınuı Ğiraqtağı tormışnı yaxşırtuğa, totrıqlılıqqa taba zur adım, dip bilgeläde.

XS
SM
MD
LG