Accessibility links

шимбә, 3 декабрь 2016, Казан вакыты 05:28

Ğiraqta intihar xöcümnär näticäsendä 9 keşe xäläk buldı


Bügen, Ğiraqnıñ elekke citäkçese Saddam Xösäyen qulğa alınğannan soñ 2 kön ütügä, Ğiraqta bulğan intihar xöcümnär näticäsendä 9 keşe xäläk buldı. Bagdadtan 30 çaqırım yıraqlıqta urnaşqan Xösäyeniä şähäreneñ politsiä bülege yanında, şartlatqıç tutırılğan maşina şartlaw näticäsendä 8 keşe, şul isäptän intiharçı üze xäläk buldı, 20-dän artığı yaralandı. Tağın ber maşina Bagdad çitendäge politsiä bülege yanında şartladı. Anda intiharçı ülde, politsiäneñ 8 xezmätkäre cäräxätlär aldı.

Şimbä könne tuğan şähäre Tikrit yanında qulğa alınğan Saddam Xösäyen, xäzer bilgesez urında amerikan xärbiläre aldında cawap tota. General Mark Hertling süzlärençä, anıñ cawapları häm dä qulğa alınğanda tabılğan dokumentlar Ğiraqnıñ tağın berniçä yuğarı räsmien qulğa alırğa mömkinlek biräçäk. General şulay uq, Saddam amerikan xärbilärenä qarşı xöcümnär belän citäkçelek itkän, digän belderü yasadı. Hertling, Saddamnıñ cawpaları Ğiraqnıñ küpläp üterü qoralı mäsäläsenä açıqlıq kerter häm dä rejimnıñ moñarçı bilgesez ğonahları turında serlärne açır digän ömet belderde. Quşma Ştatlar saqlanu ministrı Donald Rumsfeld, Saddam belän, suğış äsire bularaq, Jeneva konvensiäse nigezendä eş itäçäkbez, dip belderde. Britania tışqı eşlär ministrı Jack Straw, Saddam Ğiraqta xökem itelergä tieş digän belderü yasadı:

Audio (Jack Straw)

"Suğış cinäyätläre qaysı ildä qılınğan, şunda xökem itelergä tieş. Andıy mömkinlek bulmasa ğına xalıqara tribunalğa möräcäğät itep bula."

Fransiä tışqı eşlär ministrı Dominique de Villepin, Parij klubına kergän illär Ğiraqnıñ burıçların sızıp taşlaw mäsäläsen qararğa mömkin dip belderde. Anıñ süzlärençä, Fransiä bu adımğa barırğa äzer.

XS
SM
MD
LG