Udmurtiä mäktäplärendä ana tele uqıtuçıları daimi räweştä kvalifikatsiälären kütärä

Udmurtiä tatar ictimaği üzäge mäktäplärdä tuğan tel uqıtuçıları häm balalar baqçalarında tärbiäçelär äzerläwne küzallap, tuqsanınçı yıllar başında uq İjaw pedagogika kolliätendä tatar bülege açunı maqsat itep quydı, häm inde 1992nçe yılda anda uquçılar qabul itü bäxetenä ireşte. Berençe çığarılış qızlarınıñ barısı da diärlek mäktäplärdä ana telen uqıta, yäisä baqçada tatar törkemendä tärbiäçe bulıp xezmät itä.

Şundıylarnıñ berse — Räzinä Musa qızı Ğafurova. Räzinä üze respublikanıñ tatarlar kümäkläp yäşägän häm tellärendä üzençälekne saqlap kilgän Yukamen rayonınnan, ädäbi tatar telendä yaxşı söyläşä. Baqsañ, Räzinä Ğafurovanıñ kölliätne tämamlap, İjaw şähäreneñ 38nçe sanlı mäktäbendä eşli başlawına da unınçı yıl kitkän ikän. Bu yıllarda Räzinä Ğafurova Glazov pedagogika institutın tämamlap, yuğarı belemgä dä iä bulğan. Uqıtuçı üzeneñ kvalifikatsiäsen kütärü buyınça daimi eşli. Ğomumän, mäktäplärdä tatar tele uqıtuçıları yıl sayın üzläreneñ kvalifikatsiälären kütärüne maqsat itep quyalar. Häm yıl sayın berniçä uqıtuçı maqsatına ireşä. Bıyıl şuşındıy niäte buluın Räzinä Musa qızı Ğafurova da belderde. Häm moña centekläp äzerlänä dä başladı. Sentäberdä tatar tele uqıtıluınıñ quyılışı respublika mäğärif ministrlığınıñ kollegiä utırışında tikşerelde. Kollegiä utırışı bülmädä çinovniklar fiker alışu räweşendä uzmadı, ä mäktäplärdä açıq däreslärdä belgeçlär uqıtuçılarnıñ eşenä bäyä birde. Ul waqıtta Räzinä Musa qızı Ğafurova ürnäk alırlıq açıq däres birgän ide. Ütkän atnada, uqıtuçı berençe kvalifikatsiä alu niäte belän yañadan mäğärif belgeçläre aldında imtixan tottı. Ul ikençe sıynıfta tatar tele buyınça açıq däres kürsätte. Mäğärif bülegennän belgeçlär dä, İjaw şähäreneñ ana tele uqıtuçıları metod berläşmäse citäkçese Färidä Frunze qızı Kaşapova, başqa kollegaları Räzinä Ğafurovanıñ däresen yuğarı bäyäläp, anı berençe kategoriägä layıq uqıtuçı dip belderdelär.

Däres xaqında fikerlären 55nçe mäktäpneñ ana tele uqıtuçısı Rämzilä Raxman qızı Ğaneyeva häm metod berläşmä citäkçese Färidä Frunze qızı Kaşapova.

Audio

Räzinä Ğafurovanıñ üz täcribäsenä nigezlänep yazılğan tuğan tel däreslärendä balalarnı irken säyläşergä öyrätügä bağışlanğan referatı da xuplanıldı.

Därestän soñ Räzinä Ğafurova belän beraz söyläşep tä aldıq. Ul üzen xäzer inde mäktäptä yaxşı xis itüen, başqa cirdä xezmät itüen küz aldına kiterä dä almıy, balalar belän räxätlänep eşläwen, fänne yaratıp uqıtuın, ata—analar, kollegaları belän añlaşıp eşläwen belderde.

Audio

Ana tele uqıtuçılarınıñ daimi räweştä belemen kütärügä omtılışı, berençedän, uquçılarınıñ tuğan telen yaxşı belüendä dä, ikençedän, tatar telenä mäxäbbät tärbiäläwdä, üz xalqı belän ğorurlanu xise uyatuda da, hiçşiksez, yoğıntısı zur buluında şik yuq.

Xämidä Ğayfullina, Udmurtiä.