Accessibility links

дүшәмбе, 5 декабрь 2016, Казан вакыты 17:36

Yekaterinburg şähärendä zur sport bäyräme bulıp uzdı


15nçe dekaberdä ataqlı gimnastkalar - bertuğan Näcmetdinovalar isemen yörtüçe näfis gimnastika buyınça balalar häm yäşüsmerlär sport mäktäbe üzeneñ çirek ğasırlıq yubileyın bäyräm itte.

Näcmetdinovalar familiäse zamanında dönyalarğa yañğırağan familiä. Böyek Watan suğışına qädär Sverdlovski şähärendä eşläp kilgän tatar teatrı akterları Zäynäp apa belän Bilal ağa ğailäsendä tuıp üskän dürt qız bala tatar familiäsen böten dönyağa dan ittelär. Ölkän qız – Liliä Näcmetdinova – näfis gimnastika tarixında berençe sport masterı, bu yaña sport tören dönya arenasına berençe tapqır alıp çıqqan keşe, 1960nçı yılda uzdırılğan iñ berençe xalıqara yarışlarda ciñep çığuçı, 1965nçe yılda uzdırılğan dönyaküläm yarışlar prizyorı. Näfis gimnastika tarixın üsterüdä kertkän binihayä zur öleşe öçen bik küp xökümät büläklärenä layıq bulğan, Rusiäneñ häm Tatarstannıñ atqazanğan fizik kul'tura eşleklese.

Älfiä Näcmetdinova – tasma belän bulğan gimnastik künegülär buyınça dönya çempionı, küptörle yarışlarda qatnaşıp ciñep çıqqan keşe. Rozaliä häm İlmira Näcmetdinovalar da Rusiä, Sovetlar Soyuzı, dönya külämendä uzdırılğan bik küp yarışlarda prizlı urınnarnı alıp kilgännär.

1978nçe yılda näfis gimnastika buyınça balalar häm yäşüsmerlär sport mäktäbenä nigez salına. İñ berençe könnärdän başlap biredä ataqlı gimnastlar – apalı-señelle dürt qız tuğan Näcmetdinovalar eşli başlağannar. Menä inde 25 yıl buyı alar armıy-talmıy qız balalarnı näfislek, güzällek serlärenä öyrätälär. Çirek ğasır eçendä alar SSSR häm Rusiä buyınça 18 sport masterı, 120 masterlıqqa kandidat, 150 berençe razryadqa iä bulğan näfis gimnastika ostaları, meñnän artıq yäşüsmerlär razryadına iä bulğan sportsmennar tärbiäläp çığarğannar. Qızlarnıñ ğorurlığı – uquçıları Yuliä İvanova 1996nçı yılda Atlantada uzdırılğan Olimpiadada bronza prizğa layıq bulğan, atqazanğan sport masterı.

Älege mäktäptä tärbiälänüçe biş qız bala törle däräcädäge maturlıq konkurslarında ciñep çıqqannar. Çın mäğnäsendä güzällek, näfislek tärbiäläwçe bu mäktäpneñ danı könnän-kön arta, biredä tärbiälänergä teläweçlärneñ sanı kimemi.

Näfis gimnastika buyınça Yekaterinburg balalar häm yäşüsmerlär sport mäktäbenä Sverdlov ölkäse gubernatorı Ukazı belän küptän tügel “Bertuğan Näcmetdinovalar” iseme birelde.

Mäktäpneñ çirek ğasırlıq yubileyına qunaqlar bik küp çaqırılğan ide. Kollektivnı qotlap Sverdlov ölkäse fizik kul'tura, sport häm turizm ministrı Vladimir Vagenleytner çığış yasadı. Tatarstannıñ Uraldağı daimi wäkile urınbasarı Xäydär Ğilfanov “Bertuğan Näcmetdinovalar mäktäbe”nä Tatarstannıñ yäşlär häm sport eşläre buyınça ministrı Marat Bariev isemennän diplom tapşırdı. Bäyrämneñ töp sponsorları – Milli Media-Xolding citäkçeläre üzläreneñ täbrikläw çığışında bertuğan Näcmetdinovalarnıñ Sverdlov ölkäse tatarlarınıñ ğorurlığı, millätebezneñ yözek qaşı ikänleklären bilgeläp üttelär, alar isemen yörtüçe mäktäpkä bu isemgä layıq buluların, güzällek tärbiäläwçe sport tören üsterüdä tağın da zur uñışlar telädelär. Kiçädä şulay uq törle ictimaği oyışmalar wäkilläre dä çığış yasadı.

“Bertuğan Näcmetdinovalar mäktäbe”ndä tärbiälänüçelär kilgän qunaqlar aldında näfis gimnastika buyınça törle kompozitsiälär belän çığış yasadılar. Biregä cıyıluçılar öçen kötelmägän büläk bulıp bertuğan Näcmetdinovalarnıñ çığışı buldı. Rozaliä Näcmetdinova “Min yaratam sine, Tatarstan” cırına tatar biüe elementları kertep kompozitsiä äzerlägän. Anıñ äytüençä, tatarlarnıñ öçençe Bötendönya kongressında qatnaşıp qaytqannan soñ, alar Tatarstan yağınnan häryaqlap qayğırtuçanlıq sizep toralar ikän. “Tatarlar bezgä gel yärdäm itep toralar. Üzebezne tatar xalqınıñ ber kisäge itep toyıp, şunıñ belän ğorurlanıp yäşibez”, - didelär qızlar bertawıştan.

Qunaqlar öçen tağın ber kötelmägän büläk – Liliä Näcmetdinovanıñ çığışı buldı. Näfis gimnastika legendası bulıp sanalğan Liliä xanımğa inde 67 yäş buluğa qaramastan, buyı haman da zifa, xäräkätläre yäşlärgä alıştırğısız sığılmalı, tögäl, iskitärlek güzäl. Anıñ “Küñelem fantaziäse” dip atalğan irekle kompozitsiäsen xalıq tın da almıy qaradı häm axırdan köçle alqışlarğa kümde. Säxnägä, Liliä apaları yanına mäktäpneñ 7 yäşkä qädär bulğan tärbiälänüçeläre kilep sırılıştı.

Çäçäklärgä kümelep, sabıylarnı qoçaqlap, bäxetle yılmayıp fotoğa töşüçe Näcmetdinovalar ğailäsenä qarap soqlanmıy mömkin tügel ide. Ğömer zayağa uzmağan, änä küpme almaş üsep kilä! Yañadan-yaña uñışlarğa ireşergä nasıyp bulsın alarğa!

Fäwiä Safiullina.Yekaterinburg.

XS
SM
MD
LG