Accessibility links

чәршәмбе, 7 декабрь 2016, Казан вакыты 13:43

Tatarstan Däwlät Şurası saylawlarına äzerlek başlandı. Oppozitsiädäge köçlär berläşü yulların ezli


Tatarstan Däwlät Şurası 15nçe dekaberdä ütkärelgän utırışında parlament saylawların 14nçe martqa bilgeläde. Ä aña qädär, räsmi gäzitlärdä Respublikanı 50 saylaw okrugına bülü turında qarar basılıp çıqtı. Şulay itep, Duma saylawları äle tämamlandı ğına, ä respublika inde yaña kampaniägä äzerlek başladı.

Xakimiät firqäseneñ saylawlarğa plannarı turında Färit Möxämmätşin inde şimbä könne, firqä qorıltayında äytep birde. Anıñ süzlärençä, «Berdäm Rusiä» firqäse respublika parlamentında barlıq urınnarnı da alırğa cıyınmıy. Parlament räise şulay uq, «kiläse Däwlät Şurasında kim digändä 2 firqä bulırğa tieş. Bez xalıqqa añlatırbız, parlamentta uñnarnıñ da, sulçılarnıñ da buluı kiräk», dide.

Färit Möxämmätşin, şulay uq, qayber firqä citäkçeläre belän bu xaqta söyläşülär alıp baru mömkinlege turında da belderde. «Berdäm Rusiä» firqäse «Tatarstan-yaña ğasır» xäräkäte belän bergä üz nämzätlären kürsätergä isäpläp tora. «Ägär uñ köçlär häm sulçılar belän urtaq tel tabıp bulsa, nämzätlärne dä alar belän kileşterep çığarırğa mömkin», dip belderde «Berdäm Rusiä» firqäseneñ Tatarstan bülege citäkçese.

Xakimiät firqäse 1 mandatlı okruglarğa niçä nämzät çığarasın häm firqä isemlegenä niçä keşe kertäsen äle xäl itmägän. Berdäm Rusiä firqäseneñ apparatında äytülärenä qarağanda, saylawlarğa bäyle mäğlümatlar, firqäneñ Vnçe konferensiäsendä ğinwar urtasında iğlan iteläçäk.

Xakimiät firqäse genä tügel, alarğa oppozitsiädä toruçı säyäsi köçlär dä saylawlarğa äzerlek eşlären başladı. Bu xaqta sişämbe könne «Azatlıq» radiosı xäbärçesenä kommunistlar firqäseneñ Tatarstan bülege wäkile Robert Sadıyqov belderde.

Anıñ süzlärençä, «Tügäräk östäl» digän berläşmägä kergän oppozitsion oyışmalar saylawlarğa urtaq plannar tözi, berläşü yulların ezli. Här oyışmanıñ üz maqsatları häm säyäsi qaraşları bulğanlıqtan, barısın dä ber oyışmağa quyıp kertü mömkin tügel. Robert Sadıyqovnıñ äytüençä, saylawlar aldınnan sul-patriotik häm federal-demokratik köçlärdän torğan 2 blok barlıqqa kilergä mömkin. Demokratlar blogına «Uñ köçlär berlege», «Alma»çılar firqäläreneñ Tatarstan bülekläre, «RiZ» kebek Tatarstan berläşmäse, başqa federal häm uñ köçlär yaqlı oyışmalar kerergä mömkin. Ä sul-patriotlar blogı kommunistlar yaqlı säyäsi köçlärne berläşterergä tieş bula. Şuşı sulçılar blogına Tatar ictimaği üzäge dä kerergä isäpläp tora. Bu xaqta Tatar ictimaği üzäge citäkçese Räşit Yäğfärov belderde. Sişämbe könne, ictimaği üzäktä ütkän cıyılışta « Saylawlarğa nindi firqä belän barırğa, niçä nämzät çığarırğa?», digän mäs’älä qaralğan. Räşit Yäğfärovnıñ äytüenä qarağanda, tatar millätçeläre xäzer räsmi terkälü uzğan federal firqälär arasında fikerdäşlär ezlärgä mäcbür. Mäsälän, xäzergä alar «kommunistlar xezmät firqäse» yağına küz töbi. Bu partiä ğädäti kommunistlar firqäsennän bülenep çıqqan säyäsi oyışma bulıp tora. Şulay uq, tatar ictimaği üzäge 1 mandatlı saylaw okruglarında da üz wäkillären buldırırğa teli.

Bikä Timerova.

XS
SM
MD
LG