Rim. Ğiraqnıñ çit burıçları mäs'äläsen xäl itü turında söyläşülär öçen Quşma Ştatlarnıñ maxsus wäkile James Baker bügen İtaliä başqalasına kilde häm premyer-ministr Silvio Berlusconi belän oçraştı. Kiçä ul Fransiä prezidentı Chirac häm Germaniä kanslerı Schroeder belän küreşkän ide. İrtägä isä Baker Mäskäwgä yul tota, annan anıñ Londonğa baruwı qaralğan. Ğiraqnıñ burıçı 120 milliard dollardan artıq dip isäplänä häm James Baker üze barğan illärneñ citäkçeläre belän anı öleşçä sızıp atu xaqında söyläşülär ütkärä.
