Çärşämbe Tatarstan xäbärläre tuplanmasın ğädättägeçä köndälek räsmi xäbärlärdän başlap cibäräbez, x.t. Respublikanıñ Ministrlar Kabinetında 17nçe dekaber könne premyer-ministr Röstäm Miñnexanov Gor’kiy timer yulınıñ citäkçese Şäwkät Şäydullin belän oçraştı. Oçraşu waqıtında alar Tatarstan belän Gor’kiy timer yulı däwlät idäräse arasında xezmättäşlek turındağı kileşü imzaladılar. Xäyer, inde kileşä imzalanğançı uq ikeyaqlı xezmättäşlek şaqtıy äybät bara ide. Bu xaqta respublika tarafınnan timer yulına alıp birelgän yaña elektr poyezdları, yaña timer yulı vokzalı binasın buldıru da söyli. Läkin xäzer inde aralar tağın da yaqınayırğa tieş. Älege yaqınayunıñ ber adımı bulıp, Qazanda çärşämbe könne uzğan ber çara tora. Anda Röstäm Miñnexanov häm Şäwkät Şäydullin qatnaşlığında Gor’kiy timer yulınıñ Qazan bülege citäkçelegenä respublikanıñ Tatarstan poyezdı öçen ike ör-yaña zamança cihazlanğan vagon tapşırıldı. Sişämbe könne Tatarstan prezidentı Mintimer Şäymiev kiläse 2004 yıl byudjetı turındağı qanunğa qul quydı. Dimäk tizdän anıñ belän mäğlümat çaralarında tanışırğa mömkin bulaçaq. Şul uq könne Mintimer Şäymiev fän häm texnika ölkäsendä däwlät premiälären tapşırdı. Ä menä Tatarstannıñ Eçke eşlär ministrı Äsxät Safarov Rusiä bülägenä layıq buldı. Aña ikençe däräcädäge Böyek Petr ordenı tapşırıldı. İntertat.ru säxifäse mäğlümatlärenä qarağanda, älege büläk aña Rusiäneñ alğa kitüenä häm böyeklegenä ireşüdä kertkän öleşe öçen birelgän.
Gölnaz İlgizär
