Accessibility links

шимбә, 3 декабрь 2016, Казан вакыты 07:54

Tatarstanlılarğa Vladimir Putin belän turı efirda söyläşü forsatı çıqmadı, ä waqiğalar üz tärtibe çiratı belän bardı


Älbättä Tatarstanda da Rusiä prezidentı Vladimir Putin belän üzäk televizion kanallarında turıdan turı söyläşü cämäğätçelek iğtibarın cälep itte. Räsmi mäğlümat çaraları täfsille itep turı efirnıñ qayçan qaysı radiotelevizion kanallarda baraçağın nindi telefonnarğa çıltıratırğa, nindi internet säxifägä kerergä ikänen xäbär ittelär. Bu yulı Rusiä prezidentına soraw birü öçen Qazan Kremle qarşına küçmä televizion stansiä quyılmadı. Kiresençä, Qazan, Tatarstan xalqınıñ bıyılğı turı efir beraz mäğlümat xoquqın kiste disäñ dä bula. Däwlät televizion kanalınıñ köndezge häm kiçke yañalıqlar programması çıqmadı. Bezneñ xäbärçebez Bikä Timerova Rusiä prezidentı belän turı efir barğan waqıtta Qazan uramnarında xalıq käyefen beleşep yörde.

Qazanda räsmi çaralar “Qazan yärminkäse” kürgäzmälär üzägendä başlanıp kitte. Biredä “Energetika. Resurs saqlığı” digän kürgäzmä açıldı. Kürgäzmäne açqanda kürgäzmälär üzäge direktorı Räsül Sadıyqov älege kürgäzmädä Rusiäneñ 30 şähärennän 130 kompaniä, Tatarstannıñ 64 şirkäte häm Belorussiä, Pol'şa, Almaniä, Fransiä, Finlyandiä, Äzerbäycan wäkilläre qatnaşalar dide. Premyer ministr Röstäm Miñnexanov...energiä saqlığı respublika programmasınıñ 2000 yıldan ğämäldä buluı, respublikada energiä saqlap qalu öçen küp eşlär başqarılğanıñ läkin eşlängän eşlär näticäläre belän qänäğät bulmağannarın äytte. Respublikada mondıy kürgäzmä 4 märtäbä ütkärelä. Anıñ qısalarında simpozium ütäçäk. Şunısında äytergä kiräk bügenge kürgäzmä “Qazan yärminkäse” üzägeneñ bıyılğı manzarasına kergän soñğı çaralarnıñ berse. Barlığı utızdan artıq kürgäzmälär häm yärminkälär ütkärelgän. Qaysısı küpme däräcädä uñış qazanğandır äle yomğaq yasalmağan. Şulay da kürgäzmälär üzägendä äzerlängän iminlekkä bağışlanğan kürgäzmä materialları Mäskäwdä uzğan “Xezmät saqlığı häm iminlege-2003” digän Xalıqara kürgäzmädä uñış qazanğan. Rusiäneñ Xezmät häm sotsial' üseş ministrı Aleksandr Poçinok Tatarstan prezidentına yärdäm öçen räxmät xatı cibärgän. Xatta şulay uq Tatarstannıñ Xezmät häm mäşğüllek ministrı Boris Zaxarov häm anıñ urınbasarı Fänil Ğabdraxmanovnıñ Bötenrusiä kürgäzmä üzägeneñ büläklärenä layıq buluları turında da äytelä.

Köndälek räsmi mäğlümat çaralarında Tatarstan Däwlät Şurası deputatların saylawlarnı 14 martqa bilgeläw, xalıq deputatları Marat Mähdiov, Rinat Ğöbäydullin, Ayrat Xäyrullinnıñ Rusiä Dumasına saylanuları säbäple wäkälätläre möddätennän alda tuqtatıluı turında qararlar basılıp çıqtı. Şulay uq 15nçe dekaber belän imzalanğan prezident färmanında fän häm texnika ölkäsendä 2003nçe yıl Däwlät büläkläre iäläre isemlegen kürergä bula. İsemlektä berençe bulıp “Tatarlar monografiäse avtorları- Räwfä Urazmanova, Damir İsxaqov, Rozalinda Musina, Svetlana Suslova, Nail Xalikov, Rämziä Möxämmädova toralar.

Yunıs Ätnäle.

XS
SM
MD
LG