Accessibility links

Кайнар хәбәр

Vera Minkinağa – 85 yäş


18nçe dekaber könne respublikanıñ Mädäniät ministrlığı üzeneñ 50 yıllığın bilgeläp ütte. Şuşı uñaydan Salix Säydäşev isemendäge Zur konsertlar zalında uzğan tantanalı kiçädä Tatarstannıñ mädäniät, sänğät, teatr ähelläre, kürenekle yazuçılar, şağirlär, cırçılar, rässämnär, kinematografiä, muzey xezmätkärläre qatnaştı. Respublika citäkçelege isemennän älege ölkä xezmätkärlären qotlarğa premyer-ministr Röstäm Miñnexanov, anıñ urınbasarı Zilä Wälieva, Däwlät Şurası räise urınbasarı Robert Miñnullin kilgännär ide. Qunaqlar buş qul belän kilmäde. Xökümät isemennän ministrlıqqa mikroavtobus büläk itelde, Mädäniät ölkäsendä layıq dip tabılğannarğa maqtawlı isemnär tapşırıldı. Şulay uq kiçädä Rusiäneñ Mädäniät ministrı Mixail Şvıdkoynıñ da täbrikläw telegramması uqıldı. Äytergä kiräk, mädäniät ölkäsendä respublikanıñ qazanışları az tügel. Monda süz Tatarstanda tuıp üskän tanılğan sänğät ostaları turında ğına barmıy. Respublikanıñ xäzerge mädäni tormışın Qazanda uzdırıla torğan küpsanlı balet, opera, kamera muzıkası, tatar cırın başqaruçılar, törki xalıqlarnıñ häm başqa festival, konkurslarsız küz aldına da kiterep bulmıy. Mädäniät ministrlığınıñ da bu eşlärne başqaruda öleşe zur. Bu xaqta bäyräm kiçäsen açıp cibärgän ministr İldus Tarxanov qına tügel, başqa çığış yasawçılar da bilgeläp üttelär. Ä respublikanıñ cır häm biü kollektivları, tanılğan cırçıları häm sänğätkärläre ministrlıqnı qotlap, üzläreneñ çığışların büläk ittelär.

19nçı dekaber könne mädäniät ölkäsendä tağın ber yubiley. Comğa könne üzeneñ 85 yıllığın Tatarstannıñ häm Rusiäneñ xalıq artistkası Vera Minkina bäyräm itä. Tuğan köne belän artistkanı pänceşämbe könne prezident Mintimer Şäymiev qotladı. 1918nçe yılda xäzerge Çistay rayonı Baxta awılında tuğan Vera xanım inde menä 65 yıl säxnädän töşmi. Comğa könne anıñ 85 yäşlek yubileyı uñayınnan Ğäliäskär Kamal teatrında bäyräm kiçäse ütte. Anda Vera Minkina tamaşaçılarğa tağın ber qat “Görgöri kiäwläre”ndä Palıy obrazında çığış yasadı.

Gölnaz İlgizär
XS
SM
MD
LG