Accessibility links

шимбә, 3 декабрь 2016, Казан вакыты 22:50

Xacğa Tatarstannan 200 keşe cıyına


Bar dönya xalqı bu könnärdä Yaña 2004 yıl kilüne qarşı alırğa äzerlänsä, din totuçılar da bäyräm itärgä cıyına. Katoliklar şuşı arada Raştua bäyrämenä äzerlek çaraları kürä, ä yähüdlärneñ, mäsälän, 22 dekaber könne inde Xanuka dip isemlängän bäyrämnäre citte dä. Ä menä qayber möselmannar isä, şul isäptän tatarstannıqılar da, Xacğa barırğa äzerlek qıla başladılar. Älege eş här möselman keşese öçen bik ähämiätle häm möhim waqiğa buluın, şulay uq bu izge säfärneñ bik yıraq häm qıyın ikänlegen istä totsañ, Xacğa barunı oyıştıru da ciñel eş tügel. Şuña da, Xac säfäre äle 2004 yılnıñ Ğinwar axırında ğına bulsa da, aña äzerlek çaraları inde tämamlanıp ta kilä. Respublika Diniä näzaräte mäğlümatlärenä qarağanda, räsmi räweştä älege säfärne oyıştırırğa Rusiädä barı tik 4 kenä kompaniä wäkälätle. Alarnıñ barısı da Mäskäw xökümäte qarşındağı Xac eşläre buyınça bülegendä räsmi akkreditatsiä ütkän. Älege 4 kompaniä arasında Tatarstan Diniä näzaräte qarşında eşläwçe İdel-Xac programması da bar. Döresräge, 2001 yılnıñ aprel ayınnan birle eşläp kilgän İdel-Xac xäzerge köndä inde maxsus programma tügel, ä departament statusına iä.

Şuña da, 2004 yıldağı Xac säfärenä äzerlek, anda baru şartları belän tanışu niätennän bez Diniä Näzarätenä şaltıratıp, Xac bülege xezmätkäre Aygöl Fäyzieva belän söyläştek. Xäzer sezneñ iğtibarğa anıñ añlatmaların täqdim itäbez.



Bezneñ planıbızda bıyıl Xacğa ber oçqıç häm ber avtobus törkemen, barısı 200 tiräse keşene cibärü. Kiräkle dokumentlarnı 27 dekaber köngä, şuşı atnanıñ şimbäsenä qädär kiterep bula. Bäyälärgä kilgändä, bez alarnı soñğı könnärdä beraz töşerä aldıq. Bu eştä bezgä Üzbäkstan hawa yulları kompaniäse häm qayber banklar yärdäm itte. Xäzerge köndä İdel-Xac bülege aşa Xacğa baru bäyäse oçqıçta 50 meñ, avtobusta 39 500 sumnı täşkil itä. Läkin bu bäyägä aşaw kermi

Östäp şunı äytik, kiläse yılnıñ ğinwar ayında Xac qılırğa niätegez bar ikän, sez Tatarstannıñ Diniä näzärätenä möräcäğät itä alasız. Anıñ adresı – Qazan, Lobaçevskiy uramı, 6 yort. Östämä mäğlümatlärne, şulay uq, Diniä näzaräteneñ www.e-islam.ru adreslı internet säxifäsennän dä alıp bula.



Äytergä kiräk, Xac qılu öçen akkreditatsiä alğan 4 kompaniädän başqa älege säfärne bütän oyıştıruçılar da bar. Yış qına, alarda bäyälär dä İdel-Xac bülege aşa baruçılarnıqına qarağanda azraq bula. Läkin, qayber räsmi terkälmäwçelär yärdämendä säfärgä baruçı xacilar, üzläreneñ törle qıyınlıqlarğa oçrawları turında äytä. Tel belüçe yärdämçe yuq, oçqıçlarnı da yış qına bik ozaq kötärgä turı kilä, yäşäw şartları da bik uñaysız buldı, dip zarlanuçılar bar. Xäyer, bu oçraqta kemgä östenlek birü xaqında härkem üze xäl itä inde.

Gölnaz İlgizär

XS
SM
MD
LG