Uzğan atnanıñ yäkşämbesendä Mäskäwneñ danlıqlı curnalistlar yortında şağır Äxmät Sattarnıñ “Saw bul 20 ğasır” dip atalğan robağilar, şiğırlär kitabın tägdim itü buldı. Bu oçraşuğa mäskülelär dä, mäskäw ölkäsennän dä Äxmät Sattarnıñ şiğırlären yaratuçılar, Mäskäwneñ yazuçılar berlegennän şağirlär häm ädäbi tänqitçelär kilgän ide. Şunısın da äytergä kiräk bu oçraşunıñ töp säbäbe yaña kitap çığu belän bergä, Äxmät Sattarnı Tatarstan yazuçılar berlegenä äğzä itep alu waqiğasına da bäyle ide. Häm añar bu oçraşuda äğzälek bilgelese bulğan Tatarstan yazuçısı digän tanıqlama da tapşırıldı. Oçraşuda Qazannan Tatarstannıñ xalıq Rusiäneñ atqazanğan artistı Emil Cäläletdinow ta qatnaştı. Häm Röstäm Yäxinnıñ Axmät Sattar süzlärenä yazğan tatar cırlarınıñ altın fondına kergän “Yalğız Ağaç” häm “Serle küzlär” digän cırların başqardı. Tübän Novgorodnıñ Serğaç rayonı Qoçqa Pocar awılında tuğan Äxmät Sattar balaçağınnan başlap Mäskäwneñ Arbat uramında yäşägän. Häm ul oçraşuda şağır Woznesinski, Vladimir Vıysotskiylarnıñ anıñ Arbattağı bülmäle fatirında şiğırlären uqığan idelär dip iskä aldı. Äxmät Sattar Rus telendä dä tatar telendä dä yaza. Ul şiğırlärne balaçağınnan uq yaza başlasa da, zamanında Kreml' aşxanäsendä metrodotel, yagni ölkän ofiöiant bulıp eşlägän. Häm bu turıda “Kreml metrodotile” digän istäleklären dä basılıp çıqqan. Bu oçraşuda şulay uq Londan kitapxanäsenän, İstanbuldan , Tatarstannan kilgän qotlawlar da uqıldı. Oçraşuda şulay uq Rusiäneñ atqazanğan artistkası Nailä Fatexova da qatnaştı. Ul Äxmät Sattar süzlärenä yazğan cırların başqardı. Tamaşaçaı Äxmät Sattarnıñ cırların da şiğırlären dä alqışlap qabul itte. Tatarstan yazuçılarnıñ äğzäse buluı belän qotladı. Kiçäne “Watanım” radiosı diktorı Alsu İrkäbäy alıp bardı.
Mäskäwdän “Azatlıq” radiosı öçen Näzifä KärimowaMäskäw ölkäse milli mädäni möxtäriäte uzğan atna axırında xisap saylawlarınnan soñ berençe oçraşuın ütkärde
Mäskäw ölkäse milli mädäni möxtäriäte uzğan atna axırında xisap saylawlarınnan soñ berençe oçraşuın ütkärde.Bu oçraşuda möxtäriätneñ räise saylandı häm aldağı yılğa eş planı da tikşerelde. Räis itep yañadan, üze bu cıyılışta bulmasa da, möxtäriätneñ elekke citäkçese İlşat Mirzahit ulı Säfärğaliew bilgelände. Mäskäwneñ milli mädäni möxtäriätennän ayırmalı bularaq, Mäskäw ölkäse möxtäriäte räsmi terkälü alu belän üzeneñ basma orğanı bulğan “Watandaşlar” gazetasın çığara başlağan ide. Törle säbäplär belän bu gazeta berniçä märtäbä çığudan tuqtalıp ta tordı. Ä inde soñğı oçraşuda ike teldä çığa torğan “Watandaşlar” “Naşi sooteçestvenniki” gazetasınıñ yaña redaktorın da tägdim ittelär. Gazetanı torğızu eşenä curnalist , näşir Romen Gindulla ulı Gözäirow alındı. Annan başqa, bıyıl inde öçençe tapqır ütkäreläçäk “Mäskäw ölkäsenä Tatar sänğate” dip atalğan festival'neñ eş planı da tikşerelde. Bu cıyılışnıñ iñ yuğarı noqtası Kolomna şähärendä citeşterelä torğan xäläl rizıqlarnı tägdir itü buldı disäm, hiç tä yalğış bulmas. Kolomna şähärendä “Bäxräm” iseme belän citeşeterelä torğan törle- törle qolbasalar, at itennän peşerelgän rizıqlar , sıyır itennän yasalğan vetçinalardan awız itte oçraşuğa kilgän xalıq. Şunda ul rizıqlarnı satıp alırğa da bula ide. Bu xäläl rizıq Rusiäneñ Yevropa öleşe dini idaräse möxere belän citeşterelä, häm alar bu rizıqlarnıñ sıyfatın da tikşerep torlar ikän. İt rizıqları citeşterüçe şirkätneñ citäkçese urıs millätennän bulsa da, bezneñ suğımçılar barısı da möselmannar, bez Törekmänstanda tuıp üskän keşelär, möselman ğoref ğadätlären beläbez, biregä kilgängä ele barı tik 3 kenä yıl dide şirkätneñ citäkçese Niqolay Boçkarev. Minem tormış iptäşem törekmän millätennän anıñ iseme Näzek dide ul. Bez inde rizıqlarıbıznı Tatarstan bazarına da ozata başladıq. Alğa taba çit illärgä çığarırğa da plannar bar, berençe çiratta Macarstan belän Gollandiädä eşlerğe uylıybız dide ul. Min rizıqlarnı awız itkäç, tabında utırğannardan da fikerlären soradım. Alar barısı da bu rizıqlarnıñ çınlap xäläl buluına inanğannarın belderdelär. Häm täm yağınnan da yaxşı fikerlär äyttelär. Ägär dä Qazannıñ yä bulmasa Tübän Qamanıñ kibetlärendä “Bäxräm” dip yazılğan xäläl rizıq kürsägez, ber dä tartınmıyça awız itä alasız, bu oyışma Mäskäw möftiäte kontrolendä eşli. Häm şirkät citäkçeläreneñ antlarına qarağanda çınlap ta möselmança citeşterelgän xäläl rizıq.
