Accessibility links

җомга, 9 декабрь 2016, Казан вакыты 14:35

Mixail Xodorkovski saq astında prezident saylawlarına qädär qalaçaq


Däwlät Duması saylawları häm alarnıñ Rusiä liberal'' köçläre öçen şaqtıy ayanıçlı näticälär belän tämamlanuwı YUKOS şirkäteneñ elekke başlığı Mixail Xodorkovski tiräsendäge ığı-zığını beraz artqa çigersä dä, xäzer ul yañadan iğtibar üzägenä çıqtı. Eş şunda ki, tizdän anı saq astında totunıñ qanun taläp itkän mötdäte tula, şul mötdätne yä mäxkämä qararı belän ozaytırğa, yä inde Xodorkovskine, anıñ eşe mäxkämädä qarala başlawğa qädär çığarırğa kiräk. Düşämbe häm sişämbedä Mäskäwneñ Basmannaya mäxkämäse şuşı mäs''äläne qaradı häm YUKOS-nıñ elekke citäkçesen tağın 3 ayğa saq astında qaldırırğa buldı.

Mäğlüm bulğança, Rusiädä genä tügel, bar Könçığış Yevropada iñ bay keşe sanalğan Mixail Xodorkovski qulğa eş säfäre barışında, oçqıçı yağulıq tutırırğa töşkäç alınğan ide. Bu xäl üktäbrneñ 25-endä buldı. Şunnan birle YUKOS-nıñ elekke citäkçese saq astında utıra. Anıñ advokatları baştan uq, eşe mäxkämägä citkänçe Mixail Xodorkovskine törmädä totu kiräk tügel dip qarasa da, mäxkämä prokuratura üteneçen qänäğätländerep anı saq astında qaldırunı xup kürde. Xäzer isä süz şul mötdätne tağın da ozaytu turında bardı. Mäskäwneñ Basmannaya mäxkämäse monı inde düşämbedä ük qarıy başladı. Şul bilgele, älege mäxkämä ğädättä prokuratura taläplären bernindi qarşılıqsız ütäp kilä. Bu yulı da ul utırışnı, nindider iminlek yanawları bulu säbäple, Xodorkovski totılğan "Matrosskaya Tişina" törmäsenä küçerergä tırışıp qaradı. Yaqlaw yağı moña kisken qarşı çıqqaç qına xäkim Andrey Rasnovski ul "yanawlarnıñ" nigezle bulmawı açıqlanuwın häm utırışnıñ mäxkämä binasında däwam itäçägen belderde. Basmannaya mäxkämäseneñ Xodorkovskine saq astında qaldıru mäs''äläsen anıñ üzennän başqa ğına qararğa teläwe dä advokatlarnıñ qarşılığına oçradı häm näticädä anı utırışqa kiterergä mäcbür buldılar. Şunı da äytergä kiräk, Mixail Xodorkovskine, Genrix Padva kebek şaqtıy abruylı häm täcribäle advokatlar yaqlıy, bu yulı utırışta xätta YUKOS-nıñ çittäge advokatı Robert Amsterdam da qatnaşa aldı. Yaqlaw yağı ğomumän, Xodorkovskine saq astında totunı tağın da ozaytu Rusiäneñ üz qanunnarın bozu bulıp tora dip isäpli, häm monı isbatlaw yözennän küptän tügel genä prezident Putin tarafınnan imzalanğan cinayät eşlären tikşerü kodeksına işarä itä. Yäğni prokuratura belä torıp prezident raslağan qanunnı bozuğa etärä dip isäpli Mixail Xodorkovskineñ advokatları. Alay ğına da tügel, Basmannaya mäxkämäse Rusiä prokuraturasınıñ elekke YUKOS citäkçesen saq astında qaldıru taläben qänäğätländersä, Xodorkovski yağı şikayät belän Yevropanıñ keşe xoquqları mäxkämäsenä möräcäğät itäçägen beldergän ide. Läkin Basmannaya mäxkämäse yaqlaw yağınıñ şuşı dälillären bu yulı da iskä almasqa buldı, ber säğät elek anda Mixail Xodorkovskine saq astında tağın öç ayğa qaldıru xaqında qarar qabul itelde. Xodorkovskigä qarşı cinayät eşe açunı Mäskäwdäge belgeçlär, anıñ säyäsi ımsınuları, prezident Putingä qarşı parlament oppozitsiäsenä, ayırım alğanda, kommunistlarğa häm "Yabloko" törkemenä aqçalata yardäm kürsätüwe belän añlatqan ide. Duma saylawları şuşı ike partiäneñ dä xalıq arasındağı yaqlawı kimüen kürsätte. Läkin alda prezident saylawları tora, alar 14-nçe martqa bilgelängän, häm şunısı iğtibarnı cälep itä - prokuratura Xodorkovskine saq astında martnıñ 25-enä, yäğni prezident saylawları ütkänçegä qädär totunı täqdim itte häm Basmannaya mäxkämäse monı ike kön buyı qarağannan soñ qänäğätländerergä buldı.

Kärim Kamal, Praga
XS
SM
MD
LG