Accessibility links

шимбә, 3 декабрь 2016, Казан вакыты 03:23

Yıl azağı: saylaw östenä saylaw, yomğaq östenä yomğaq


“Tatarstan prezidentı Mintimer Şäymiev Kirov, Tver', Saxalin ölkälärenä häm Başqortstan respublikasına bu töbäklärdä Rusiä subyektları başlıqları saylanu uñayınnan qotlaw telegrammaları yunälderde“- dielä sişämbe räsmi xäbärlärendä. Mortaza Räximovqa cibärelgän telegrammada-“saylawçılar xuplawı prezident postında uñışlı eşçänlekkä yaña köçlär birer häm tuğandaş Başqortstan totrıqlı häm xäräkätçän üseşkä barır”- digän ışanıç belderelgän. Mäğlüm ki Başqortstannıñ yaña saylanğan prezidentınıñ inagurasiäse 27 dekabergä bilgelänüe, anda İdel buyı federal' okruğı citäkçese Sergey Kireenqo qatnaşası iğlan itelde inde. Tatarstan prezidentınıñ mätbüğat üzägendä sişämbe könne Mintimer Şäymievneñ älege inaugurasiädä qatnaşuı qatnaşmawı äle bilgesez didelär. Ä menä Tatarstan parlamentına saylawlar barışı könnän kön açıqlana bara. Üzäk saylaw komissiäse Tatarstan Däwlät Şurasına saylawlarğa äzerlekneñ köndälek manzarasın qabul itte. Saylawlarda qatnaşuçı nämzätlär, firqalär häm bloklar okrug saylaw komissiälärenä 29 dekaberdän başlap dokumentların tapşıra başlıy alalar. Dokumentlar qabul itü 28 ğinwarda tögällänä. Parlament saylawları aldı wäzğıäte turında täfsille itep Bikä Timerova. İqtisadıy yañalıqlar könnän kön iskerä barğan yıl yomğaqları belän bäyle. Tatarstan iqtisadınıñ törle tarmaqları 2003 yıl yomgaqları yasıy başladılar. “Tatneft'” general' direktorı Şäfäğät Täxäüetdinov berläşmä öçen 2003 yıl yomğaqların tulayım uñay bäyäli. Neft' çığaru berläşmädä 2002 yıl belän çağıştırğanda 0,22 protsentqa artqan. 17 milliard rubl' tabış kötelä. Läkin kiläçäktä finans totrıqlılığın saqlap qalu öçen neft' çığaru üseşen yıl sayın 1 protsentqa artuın, çığımnarnıñ 10 protsentqa kimüen tä'min itärgä kiräk. Kompaniäneñ finans iminlegä neftkä dönya bäyäläre üzgärügä bäyle. “Tatneft'” kompaniäseneñ üseş programması neft'neñ bäyäse tışqı bazarda barrelenä 20 dollardan isäpläp tözelgän-dielä räsmi xäbärdä. Xäyer Tatarstan neft' kompaniäläreneñ finans totrıqlılıq tä'min itüdä tağın ber ışanıçı bar. Ul neftne üzebezdä eşkärtep äzer produksiä itep satu. Tatarstan iqtisatı bu yunäleştädä nıqlap eşli. Küptän tügel Tübän Qama neft' eşkärtü zavodı eşli başladı. Sişämbe könne Ministrlar Kabinetı brifingında Tübän Qama zavodı citäkçelege Kön'yak Koreyänıñ LG kompaniäse Tatarstannıñ neft' eşkärtü tarmağına milliardlar belän isäplängän investitsiälär kertergä xäl qılğan dip belderde. Mäğlüm ki küptän tügel LG kompaniäse wäkilläre Säwdä häm tışqı iqtisadıy xezmättäşlek ministrlığı başlanğıçı belän Tatarstan iqtisatı mömkinlekläre belän tanışıp kitkännär ide. Şulay itep Säwdä häm iqtisadıy xezmättäşlek ministrlığınıñ uzıp baruçı yılnıñ iqtisadıy yomğaqlarına kertkän xezmäteneñ faydası kürelä. Älege ministrlıqnıñ citäkçese Xafiz Salixov Ministrlar Kabinetı utırışında yıl yomğaqları buyınça xisap tottı. Soñğı öç yılda Tatarstannıñ tışqı säwdäse ikelätä artqan. Tatarstanğa Rusiä xökümäteneñ vitse premyerı Boris Aleşinnıñ kilüdä oçraqlı tügel dilär. Boris Aleşin Rusiä xökümäteneñ sänäğät, fän häm texniqa säyäsäte öçen cawaplı keşese. Sişämbe könne ul Qazandağı avia tözeleş şirkätläre mömkinlekläre belän tanışıp yörde. Qazan aviatözeleş berläşmäsendä cıyılğan TU-214 oçqıçın “Dal'avia” şirkätenä tapşıru tantanasında qatnaştı. Räsmi mäğlümat çaraları Rusiä vitse-premyerı Tatarstan sänäğäteneñ aviatözeleş tarmağı mömkinleklären uñay bäyäläde-dip xäbär ittelär.

Yunıs Ätnäle.

XS
SM
MD
LG